Դետեկտիվը սերիալներից հոգնել եւ կյանք է մտել

2011-ի երկրորդ եռամսյակում գրանցվել է լրագրողների դեմ ֆիզիկական ճնշման 2 դեպք, ի տարբերություն 2010-ին գրանցված 3 դեպքի. լրագրողների հետ հանդիպման ժամանակ տեղեկացրեց Խոսքի ազատության պաշտպանության կոմիտեի նախագահ Աշոտ Մելիքյանը:

Նա նաեւ նշեց, որ երկու դեպքում էլ քաղաքացիական հասարակության ներկայացուցիչներն են եղել բռնություն գործադրողները, ինչը փաստում է, որ խոսքի նկատմամբ հարգանքը բավական ցածր է:

Ա.Մելիքյանը տեղեկացրեց, որ տարօրինակ էր «Իրավունք» թերթի լրագրող Գայանե Զարգարյանի հետ կատարված դեպքը. վերջինս նկատել էր, որ գրեթե 1 ամիս ինչ-որ մեքենա է հետեւում իրեն եւ անգամ լսել էր, թե ինչպես են զենք լիցքավորում:

Ինչ վերաբերում է ՍԻՄ նախագահ, «Իրավունք»-ի խմբագիր Հայկ Բաբուխանյանի` ընդդեմ Report.am լրատվական կայքի դատական հայցին, ապա, Մելիքյանի կարծիքով, նրանք հարցերը պետք է իրենց մեջ պարզեին:

«Կարծում եմ` 2 լրատվամիջոցների միջեւ ծագած հարցերը կարելի էր լրագրողական համայնքի միջոցով լուծել, այլ ոչ թե դատարան դիմել»,- ասաց նա: