Արեւի լավ եւ վատ կողմերը

Մարդու օրգանիզմի նորմալ կենսագործունեության վրա շոգ եղանակին ազդում են երկու կարեւորագույն գործոններ` ջերմային ցուցանիշները եւ ուլտրամանուշակագույն ճառագայթները. լրագրողների հետ հանդիպման ժամանակ ասաց ՀՀ առողջապահության նախարարության հիգիենիկ եւ հակահամաճարակային պետական տեսչության պետ Արտավազդ Վանյանը:

Նրա խոսքերով` ճառագայթներն ազդում են իմունային, ոսկրային համակարգերի ձեւավորման, նյութափոխանակության վրա, սակայն կարող են նաեւ բացասական ազդեցություն ունենալ, այսինքն` ժամը 12-17-ը բավական ինտենսիվ ճառագայթում է տեղի ունենում եւ կարող են առաջացնել անգամ մաշկային նորագոյացություններ, տեղային ախտահարումներ, այրվածքներ, ալերգիկ երեւույթներ: Այս առումով ռիսկային խմբում են հղի կանայք, ծերերը և երեխաները:

«Այդ ժամերին պետք չէ դուրս գալ տնից, հարկավոր է քնել կամ պարզապես պառկել, այդպես ավելի հեշտ կհաղթահարվի շոգը: Անպայման պետք է կրել գլխարկ եւ ակնոց, նախընտրելի են բաց գույնի, օդաթափանց, բամբակյա հագուստները: Անհրաժեշտ է շատ հեղուկ օգտագործել` ջուր, թան` հնարավորինս ոչ սառը վիճակում»,- ասաց Վանյանը` հավելելով, որ չի կարելի չարաշահել կոֆեինի եւ շաքարավազի պարունակությամբ մթերքները, քանի որ դրանք արագացնում են քրտնարտադրությունը:

Ա. Վանյանը վերջում նշեց, որ ջերմաստիճանի խիստ բարձրացման հետեւանքով հնարավոր է աշխատաժամերի կրճատում: