ՀՐԱՊԱՐԱԿ. Դավիթ Սարգսյանը` տնօրենի գլխավոր խորհրդական

Չնայած Ազգային գրադարանի կոլեկտիվի և մտավորականների պայքարին` տնօրեն Դավիթ Սարգսյանին հեռացրին, և պաշտոնակատար նշանակվեց Տիգրան Զարգարյանը:

Այդ օրերին Դավիթ Սարգսյանը մեզ ասել էր, որ եթե ծանուցագրին հաջորդի աշխատանքից ազատելու հրամանը, ինքը մամլո ասուլիս կհրավիրի ու կխոսի ամենախոցելի նախարարի վարած մշակութային քաղաքականության բարոյահոգեբանական կողմերի մասին: Չկայացած ասուլիսի հետևանքով երեկ զանգահարեցինք Դավիթ Սարգսյանին, ով նշեց, որ ասուլիսը հետաձգել է, քանի որ առողջական խնդիրներով է զբաղված:

«Սրտի հետ կապված խնդիրներ են, երևի նյարդային վիճակից, փորձում եմ շատ չջղայնանալ: Հետո էլ ուզում եմ հնարավորինս հետաձգել ասուլիսը, որ ինչ-որ հանգրվան լինի, ասելիք ունենամ և կարողանամ լրջորեն խոսել խնդիրների մասին», - նշեց նա:

Պարոն Սարգսյանը հերքեց այն լուրը, թե ասուլիսը տեղի չունեցավ իրեն աշխատանք առաջարկելու պատճառով: Թեև առաջարկը եղել է, և այն ընդունել է: Նա նշանակվել է Ազգային գրադարանի տնօրենի գլխավոր խորհրդական և գիտխորհրդի նախագահ. «Ստիպված էի ընդունել առաջարկը, որովհետև անձնական բիզնես, ապրուստի այլ միջոց չունեմ»:

Քանի որ պայմանագիրը կնքվել է 2 օր առաջ, եւ ինքն էլ դեռ առողջական խնդիրներ ունի, առայժմ աշխատանքի չի գնում: «Մի քիչ կարգավորվեմ`անպայման կգնամ, որովհետև ուզում եմ կոլեկտիվիս հետ լինել»,- ասաց Դ. Սարգսյանը:

Պարզ չէ, սակայն, թե ինչպես են համատեղ աշխատելու հինն ու նորը: