Մեղադրվում է մեղադրյալի հետ Facebook-ում կապ հաստատելու համար

Լոնդոնի Թագավորական դատարանի ատենակալ Ջոան Ֆրեյլի նկատմամբ քրեական գործ է հարուցվել այն բանի համար, որ մեղադրյալի հետ Facebook-ում նամակագրություն է ունեցել. տեղեկացնում է The Independent-ը:

Ֆրեյլը մասնակցում էր թմրանյութերի վաճառքի գործով դատավարությանը:

«Նրա արարքը դատապարտելի է, սակայն նա նպատակ չի ունեցել տապալել դատական գործընթացը»,- ասել է նրա փաստաբանը:

Անցյալ տարվա օգոստոսին Ֆրեյլը Facebook-ում կապ է հաստատել մեղադրյալ Ջեյմի Ստյուարտի հետ: Նրա խոսքերով` ինքը չի կարողացել հավատալ, որ աղջիկը մեղավոր է: Հերթական դատական լսումներից հետո Ֆրեյլը ինտերնետում փորձել է տեղեկատվություն գտնել մեղադրյալների մասին:

Մինչդեռ դատախազների կարծիքով` նա անհարգալից վերաբերմունք է ցուցաբերել դատարանի նկատմամբ: Օրենքի համաձայն` ատենակալները որոշում են կայացնում բացառապես ցուցմունքների, այլ ոչ թե այլ աղբյուրներից ստացված այլ տեղեկատվության հիման վրա:

Ֆրեյլը մեղադրվում է դատական գործընթացը ձախողելու մեջ. դատավորը ստիպված է եղել առանց գործն ավարտին հասցնելու լուծարել ատենակալների հանձնաժողովը: Ֆրեյլին սպառնում է 2 տարի բանտարկություն: Դատարանը վճիռ կկայացնի վաղը` հունիսի 16-ին: