Յուրա Պողոսյանին նվիրված հուշ-ցերեկույթ` ԵՊՀ-ում

Արցախյան հերոսամարտում զոհված մարտիկներն այսօր էլ հիշվում ու գնահատվում են: Դրա վառ ապացույցն է հունիսի 15-ին ԵՊՀ Չարենցի անվան դահլիճում կազմակերպած ՀՀ եւ ԼՂՀ ազգային հերոս Յուրա Պողոսյանի մահվան 19-րդ տարելիցին եւ ծննդյան 50-ամյակին նվիրված միջոցառումը:

Միջոցառումը սկսվեց Յուրա Պողոսյանի կյանքի մասին պատմող տեսաշարով: Նա Արցախյան շարժման այն առաջամարտիկներից է, որ մինչեւ մահ մնաց մարտական դիրքերում:

Սկզբնական շրջանում զբաղվում էր զենքերի պատրաստմամբ: Նրա պատրաստած զենքերն առաջին անգամ օգտագործվել են 1990 թվականին Հադրութում, իսկ արդեն 1991-ին նա Լեռնային Ղարաբաղի Պաշտպանության բանակում էր:

1991-1992 թթ. Յուրի Պողոսյանը 4-րդ վաշտի հրամանատարն էր: Այնուհետեւ նա դառնում է հակառակորդից առգրավված առաջին զրահամեքենաներից մեկի հրամանատարը:

Յուրա Պողոսյանի մարտական ընկերներից Մարտիկ Հայրապետյանը պատմեց մարտական դրվագներ, խոսեց ընկերոջ մարդկային կերպարի մասին. «Յուրան առաջինն էր նետվում ռազմի դաշտ, նրան էին վստահվում ամենածանր ռազմական գործողությունները, և նրան հաջողվում էր դրանք հասցնել հաջող ավարտի»:

Միջոցառմանը ներկա էին նաեւ ՀՀ պաշտպանության նախարար Սեյրան Օհանյանը, ԵՊՀ ռեկտորի պաշտոնակատար Արամ Սիմոնյանը, ուսանողներ, Յուրա Պողոսյանի հարազատներն ու մարտական ընկերները:

Սեյրան Օհանյանն իր ելույթում նշեց, որ շատ կարեւոր է, երբ այսպիսի միջոցառումներն անցկացվում են հենց ԵՊՀ-ի հարկի տակմ որովհետեւ սա այն օջախն է, որը ուշադրություն է դարձնում ռազմահայրենասիրական դաստիարակությանը: Նա նշեց, որ 2011-ը խորհրդանշական է` նշում ենք ԼՂՀ եւ ՀՀ անկախության 20-ամյակն ու մեծանուն հայի` Գարեգին Նժդեհի ծննդյան 125-ամյակը: Նման միջոցառումները կլինեն տեւական, որպեսզի շատերը ծանոթանան մեր ազգային հերոսների կյանքին ու գործունեությանը:

Անդրադառնալով Յուրա Պողոսյանին` նախարարը հավելեց, որ ինքն ու Յուրին շատերի հետ անցել են նույն մարտական ճանապարհը, սակայն իր ընկերներից շատերը, այդ թվում` Յուրին, չհասցրին տեսնել իրենց պայքարի արդյունքները:

Ազատամարտիկը զոհվել է ռազմաճակատի Ասկերան-Նախիջեւան հատվածում, իսկ նրա աճյունն ամփոփված է Ստեփանակերտի գերեզմանատանը:

Անուշ Ամիրբեկյան