Մոսկվայում կայացել է արտգործնախարարների հանդիպումը

Հայաստանի, Ռուսաստանի եւ Ադրբեջանի արտաքին գործերի նախարարներ` Էդվարդ Նալբանդյանը, Սերգեյ Լավրովը եւ Էլմար Մամեդյարովը հանդիպել են Մոսկվայում: Աշխատանքային հանդիպման ընթացքում քննարկել են Ղարաբաղյան հակամարտության կարգավորման հիմնարար սկզբունքները. տեղեկացնում է «Նովոստի» լրատվական գործակալությունը:

Հայաստանի արտգործնախարարության մամուլի ծառայության կողմից տարածված հաղորդագրության համաձայն` հանդիպման ընթացքում հնարավոր է դարձել մերձեցնել դիրքորոշումները Լեռնային Ղարաբաղի հակամարտության կարգավորման հիմնարար սկզբունքներին առնչվող մի շարք կարեւոր հարցերի շուրջ։

«Վերոհիշյալ փաստաթղթի նախագիծը քննարկվելու է այս տարվա հունիսի վերջին կայանալիք հերթական եռակողմ համաժողովի ընթացքում», - նշված է Հայաստանի արտգործնախարարության հաղորդագրության մեջ։

Հիշեցնենք, որ Հայաստանի, Ադրբեջանի եւ Ռուսաստանի նախագահների եռակողմ հանդիպումը կայանալու է Կազանում հունիսի 25-ին։