Վերջը բարի լինի

Ինչպես «Երկիր»-ին տեղեկացրին Թբիլիսիից, նախագահ Սահակաշվիլին հանդիպման ժամանակ նշել է, որ Ամենայն Հայոց կաթողիկոսի այցն ավելի կամրապնդի երկու ժողովուրդների միջեւ պատմական, բարեկամական հարաբերությունները:

Նախագահը հյուրին ցույց է տվել նախագահական նստավայրը, այնուհետեւ բարձրաստիճան հոգեւորականների պատվին հանդես է եկել «Սուխիշվիլի» համույթը:

Սահակաշվիլու ջերմ ընդունելությունը հայ հոգեւորականների կողմից ընկալվել է որպես խոստումնալից նշան: Վիրահայոց թեմի առաջնորդ Վազգեն Միրզախանյանը հույս է հայտնել, որ Թբիլիսիի եւ Ախալցխայի եկեղեցիները հայկական թեմի վերահսկողության տակ անցնելու վերաբերյալ հարցը վերջապես դրական լուծում կստանա: 

«Որոշ չլուծված հարցեր կան, որոնք խանգարում են մեր ազգերի եւ եկեղեցիների փոխհարաբերություններին»,- այսել է Միրզախանյանը` հույս հայտնելով, որ երկու երկրների հոգեւոր առաջնորդները կկարողանան լուծում գտնել, իսկ իրենք այդ որոշումները կյանքի կկոչեն:

Հիշեցնենք, որ խոսքը հայկական 6 եկեղեցիների մասին է, դրանք իրենց դռները հավատացյալների առջեւ փակել են դեռեւս խորհրդային տարիներին եւ չեն գործում մինչ օրս:

Վրաստանի օրենքներով` այդ եկեղեցիները գտնվում են վրացական պատրիարքության վերահսկողության տակ: Տարիներ առաջ Մայր Աթոռը պաշտոնապես առաջարկեց սկսել ծեսեր իրականացնել հայկական այդ եկեղեցիներում, որին ի պատասխան` վրացական կողմը հայտարարեց, որ նախ պետք է որոշել այդ եկեղեցիների պատմական պատկանելությունը եւ պարզել` դրանք իրո՞ք հայկական են: