ՀԵՏՔ. Տիգրան Արզաքանցյանի "առողջապահական կուրսերը"` Փարիզում

Լրագրողների հարցին, թե ինչո՞ւ չի մասնակցում խորհրդարանի աշխատանքներին, Տիգրան Արզաքանցյանը պատասխանել է` հիվանդ եմ, եւ միաժամանակ թվել է մի քանի երկրների անուններ, որտեղ «անցկացնում է բուժման կուրսեր»:

Բայց Տիգրան Արզաքանցյանին ավելի շատ կարելի է հանդիպել ոչ թե առողջարանական, այլ ուրիշ հաստատություններում` կազինոներում, գիշերային եւ այլ ակումբներում: Չի բացառվում, որ բժիշկները հենց նման դեղատոմս են տվել ԱԺ պատգամավորին:

Ներկայացնենք մի քանի այլ փաստեր պատգամավորի փարիզյան կյանքից եւ ունեցվածքից, որոնց մասին նա չի նշել ՀՀ պետեկամուտների կոմիտեին հանձնված` տարբեր տարիների հայտարարագրերում:

Masrnes-la Coquette-ը, որտեղ գտնվում է Արզաքանցյանի առանձնատունը, փարիզամերձ փոքրիկ քաղաք է: Ֆրանսիայի վիճակագրական եւ տնտեսական հետազոտությունների ազգային ինստիտուտի տվյալներով` այն շատ թանկ թաղամաս է: Այստեղ են գտնվում Քաթարի էմիրի, հայտնի երգիչ Ջոնի Հոլիդեյի եւ այլ հանրահայտ մարդկանց առանձնատները:

Ըստ Ֆրանսիայի կադաստրի ռեգիստրում առկա տվյալների` առանձնատան հողատարածքը 4240 քմ է, առանձնատան առաջին հարկի տարածքը` 197 քմ: Դա նշանակում է, որ եռահարկ առանձնատունը զբաղեցնում է մոտ 570 քմ տարածք: Այս առանձնատան արժեքը գնահատված է 7,6 մլն եվրո: Հայցում ենք ընթերցողների եւ Տիգրան Արզաքանցյանի ներողամտությունը նախկինում առանձնատան արժեքը ցածր ներկայացնելու համար: Իսկ եթե որեւէ մեկը ցանկանում է տեսնել առանձնատան նկարները կարող է այցելել հետեւյալ կայքէջը:

Ինչպես արդեն նշել ենք, Տիգրան Արզաքանցյանն իր բիզնեսը ձեւակերպել է կնոջ անունով: Այժմ այդ ձեռնարկությունների անվանումները չենք հրապարակում` սպասելով պատգամավորի` «Հետքի» ներկայացրած փաստերը հերքելու «խոստումին»:

Իսկ Տիգրան Արզաքանցյանի փարիզյան բոհեմական կյանքի մասին կարելի է պատկերացում կազմել այս նկարից, որն արվել է Փարիզի հանրահայտ Espace Cardin ակումբում: Լուսանկարում Արզաքանցյանը ռուս դիզայներ Ալյոնա Վոլսկայայի հետ է: Այս երեկոյի մասնակիցներին հյուրասիրել են Ֆրանսիայում Արզաքանցյանին պատկանող գործարանի կոնյակը: