Վտանգի տակ են

Երկրաբանական գիտությունների թեկնածու Ռուբեն Յադոյանը կարծիք է հայտնել, որ Արարատյան դաշտավայրի ջրօգտագործման համակարգը մեծ ռիսկեր է պարունակում խմելու ջրի համար:

Ստորգետնյա եւ արտեզյան աղբյուրների սպառումը թույլ չտալու համար, կառավարության որոշմամբ, ձկնաբուծարաններում ջրաչափեր են տեղադրել, սակայն, ըստ Յադոյանի, եթե ջրօգտագործողները շարունակեն հզոր պոմպեր կիրառել, ապա խմելու ջուրը կդառնա ոչ պիտանի:

«Չի կարելի Արարատյան դաշտավայրի ջուրը հզոր պոմպով քաշել: Ջրի երեք հորիզոն կա. վերեւինը քաղցրահամ է, բայց խմելու չէ, ներքեւի երկուսն են խմելու: Դրանք կխառնվեն, շարքից դուրս կգան, հետո հնարավոր չի լինի վերականգնել: Բացի այդ` Արարատյան դաշտավայրի իջվածքի տակ հանքային ջրեր կան: Եթե  ցած իջնես, այդ հանքային ջուրն էլ կհանես, կխառնես, քաղցրահամ ջրերը կփչացնես»,- ասաց Ռ. Յադոյանը:

Նշենք նաեւ, որ ներկայումս Արարատյան դաշտավայրում գործում է 234 ձկնաբուծարան, որոնք, ընդհանուր առմամբ, շահագործում են մոտ 450 խորքային հորեր: Ըստ մասնագետների` միայն ձկնաբուծական տնտեսությունները տարեկան 800 մլն խմ ջուր են արդյունահանում: