Վթարային շենքի բնակիչներին տարհանել են

Մայիսի 14-ին տեղեկատվություն է ստացվել, որ Սյունիքի մարզի Մեղրի քաղաքի Փարամազ փողոցի թիվ 15 շենքը վթարային վիճակում է:

Դեպքի վայր մեկնած հրշեջ-փրկարարները տեղում պարզել են, որ վնասվել են 1987 թվականին կառուցված շենքի (9 հարկ, 36 բնակարան, 33-ը` բնակելի) երկաթբետոնե սյուները, եւ առկա է փլուզման վտանգ: Քաղաքապետ Ս. Հայրապետյանի կողմից որոշում է կայացվել տարհանել բնակիչներին:

Հրշեջ-փրկարարների, ոստիկանների և քաղաքապետարանի աշխատակիցների ուժերով տարահանվել է 125 բնակիչ, որոնք տեղավորվել են հարազատների տներում: Բնակարաններից մեկի բնակիչները (5 անձ) հրաժարվել են տարհանվել:

Շենքը շրջափակվել է ժապավեններով, հրշեջ-փրկարարների և ոստիկանների ուժերով սահմանվել է հերթապահություն. տեղեկացնում է «Արտակարգ ալիքը»: