Սահմանին խաղաղ բնակիչ է սպանվել

Ադրբեջանական բանակի առաջապահ ուժերը շփման գծի տարբեր ուղղություններում շարունակում են պարբերաբար խախտել հրադադարի ռեժիմը: Միայն վերջին երկու օրերի ընթացքում հակառակորդը տարբեր տրամաչափի զինատեսակներից ՊԲ դիրքերը գնդակոծել է ավելի քան 400 անգամ, որի արդյունքում հայկական կողմը ունեցել է կորուստ:

Մայիսի 11-ին ղարաբաղա-ադրբեջանական հակամարտ զորքերի շփման գոտու հարավարևելյան սահմանահատվածում տրակտորով աշխատելիս` հակառակորդի կողմից ժամը 18:05-ի սահմաններում արձակված գնդակից գլխի շրջանում հրազենային մահացու վերք է ստացել Հադրութի շրջանի Քյուրաթաղ գյուղի բնակիչ, 1978թ. ծնված Արայիկ Նելսոնի Բալասանյանը: Հադրութի քաղաքացիական հիվանդանոց տեղափոխվելու ճանապարհին նա մահացել է:

Միջադեպի հետ կապված մանրամասները ճշտվում են: