ԸՕ բարեփոխումները չեն բավարարում

Այսօր Դաշնակցության նախաձեռնած «Ընտրական իրավունքի պաշտպանության շարժման» շրջանակներում տեղի ունեցավ համաժողով` Ընտրական օրենսգրքի բարեփոխումների թեմայով:

Հանդիպմանը մասնակցում էին պատգամավորներ ԱԺ տարբեր խմբակցություններից, ինչպես նաեւ հասարակական կազմակերպությունների ներկայացուցիչներ:

Քննարկմանը մասնակցեց նաեւ ՀՀ ՄԻՊ Կարեն Անդրեասյանը: Հիշեցնենք, որ վերջինիս ընտրությունից առաջ նրա դասախոս եւ ՀՀԿ-ական պատգամավոր Ռաֆիկ Պետրոսյանը հորդորել նրան ձեռնպահ մնալ ընտրական այս, ինչպես նաեւ այլ շարժումներին մասնակցելուց։

Անդրադառնալով ՀՅԴ-ի կողմից առաջարկվող` ընտրությունից հետո մասնակիցների ցուցակները հրապարակելու մասին դրույթին եւ  կոալիցիոն ուժերի շահարկումներին, թե դրանով կխախտվի մարդու` ընտրությանը ներկայանալու գաղտնիության իրավունքը, ՀՅԴ խմբակցության ղեկավար Վահան Հովհաննիսյանը նշեց, որ նժարին երկու խնդիր է դրված: «Ո՞ր իրավունքն է կարեւոր` մարդու` ընտրության ներկայանալու գաղտնիության իրավունքը, թե՞ ժողովրդի` ընտրական ճանապարհով իշխանությունը փոխելու իրավունքը»,- հարցրեց նա եւ կարեւորեց երկրորդը:

«Ընտրությունների հարցում հասարակական վստահության դեֆիցիտը մեր ամենալուրջ խնդիրն է»,- իր ելույթում նշեց մարդու իրավունքների պաշտպանը:

Համաժողովի ընթացքում կարեւորվեցին ՀՅԴ-ի համար սկզբունքային հիմնական  կետերը` 100 տոկոսանոց համամասնական ընտրակարգ, ընտրական հանձնաժողովի ձեւավորում` կառավարական կոալիցիա եւ խորհրդարանական ընդդիմություն 50-50 տոկոս հարաբերակցությամբ, քվեարկության մատյանների հրապարակում:

ԱԺ պետաիրավական հարցերի մշտական հանձնաժողովի նախագահ Դավիթ Հարությունյանը նշեց, որ, իրենց համոզմամբ, այս փուլում ընտրակարգի մոդել փոխելու եւ 100 տոկոսանոց համամասնական ընտրակարգի անցնելու անհրաժեշտություն չի տեսնում: Մեծամասնակա՞ն, թե՞ համամասնական վեճերը, Դավիթ Հարությունյանի համոզմամբ, հավերժական են, եւ համամասնականի անցումը բարեփոխումներին մոտանալու  լավագույն ձեւը չէ:

«Առաջին ընթերցմամբ ընդունված ընտրական նոր օրենսդրական փաթեթը չի բավարարում ազատ եւ արդար ընտրությունների անցկացման չափանիշներին եւ պահանջում է հաշվի առնել ու իրացնել քաղաքացիական հասարակության եւ խորհրդարանական ընդդիմության առաջարկները»,- ասված է համաժողովի ընդունած բանաձեւում։