Ծեծվածի տեսք ունե՞մ

«Դե հիմա ծեծվածի տպավորություն չեմ թողնում, չէ՞»,- այսպես պատասխանեց ԱԺ պատգամավոր Վարդան Այվազյանը մամուլում շրջանառվող լուրերին, թե իրեն ծեծել են խաղատանը:

Նրա խոսքերով` այս տեղեկատվության  հրապարակումով ինչ-որ մեկը փորձել է քաղաքական եւ տղայական խնդիրներ լուծել: Քաղաքական տեսանկյունից դա սեւ PR է եւ փորձ` ստվեր գցել այն քաղաքական թիմի վրա, որին անդամակցում է պատգամավորը:

Ինչ վերաբերում է տղայական խնդիրներին, Վ. Այվազյանն ասաց. «Ես ցավում եմ էդ լրատվության համար: Էդ գրողը թող գա, ասի` ում հետ եմ եղել: Եթե այդ տղան կա, մեջը տղամարդկային բան կա, թող գա պատասխանեմ, թե իր որ հարազատի հետ էի: Լոնդոնից բռնացրած ինձ զանգում են, էն օրն էլ Վրաստանից էին զանգել, թե բա հո՞ բան չի եղել»:

Թե ով է այս աղմուկի հեղինակը, Վ. Այվազյանին գրեթե հայտնի է. «Էդ պատվեր տվողի ականջները հետեւից երեւում են: Մի օր կքաշեմ, դեմքն էլ կտեսնեք»:

Ինչ վերաբերում է խաղատուն գնալ-չգնալուն, ապա պատգամավորը նշեց, որ դրանց գործունեությունը օրենքով թույլատրված է, եւ մոտ 18.9 միլիոն դրամ հարկ են վճարում:

Նա նշեց նաեւ, որ ինքը մեկ-մեկ գնում է խաղատներ, իր հյուրերին էլ է տանում:

«Ամո՞թ տեղ է` արգելե'ք: Կարո՞ղ է բաղնիքներն էլ փակեք»,- ասաց Վ. Այվազյանը` հավելելով, թե բոլորովին պարտադիր չէ խաղատուն գնալ ու խաղալը,  այնտեղ, օրինակ, համերգներ էլ են լինում: