ԺԱՄԱՆԱԿ. Տրաքում են

ՕԵԿ գրասենյակի մոտ առաջին հայացքից բավական «անմեղ» գովազդային պաստառ է հայտնվել, որը, սակայն, ՕԵԿ-ում պարբերաբար զայրույթի պահեր է ստեղծում:

Գովազդային մեծ վահանակի վրա պատկերված է «Դե ֆակտո» ամսագիրը, որի շապիկին ԱԺ փոխխոսնակ, նախկին ՕԵԿ-ական, ներկայումս` ԲՀԿ փոխնախագահ Սամվել Բալասանյանի լուսանկարն է:

Գովազդային պաստառն այնպես է փակցված, որ ՕԵԿ-ականները լուսամուտից նայելիս ուզեն, թե չուզեն «հանդիպում են» Բալասանյանին: Իսկ իրենց նախկին կուսակցական ընկերոջ հետ «առերեսումը» ոչ միայն չի ոգեւորում ՕԵԿ-ականներին, այլեւ այդ փաստը բավական ծանր են տանում:

Որոշ ՕԵԿ-ականներ նույնիսկ կարծիք են հայտնել, թե ԲՀԿ-ն միտումնավոր է իրենց լուսամուտների մոտ այդ գովազդը փակցրել: