Դատարանում կցուցադրեն Ջեքսոնի դիահերձման լուսանկարները

Երեկ Լոս Անջելեսի դատարանը Մայքլ Ջեքսոնի անձնական բժշկի դատավարության ընթացքում թույլ է տվել ատենակալներին` տեսնելու Փոփ-արքայի դիահերձման լուսանկարները. հայտնում է Reuters-ը:

Մի լուսանկարում 50-ամյա Ջեքսոնն ամբողջությամբ հագնված է, իսկ մյուսում՝ մերկ: Բժիշկ Քոնրադ Մյուրեյի մեղադրողները փորձում են նկարների միջոցով ցուցադրել, որ երգիչը մահվան պահին միանգամայն առողջ է եղել:

 Մյուրեյի դատապաշտպանները, սակայն, առարկել են դիահերձման լուսանկարները դատարանում ցուցադրելու առթիվ` այն որակելով որպես «սարսափ» և զգացական ազդեցիկ մթնոլորտ առաջացնող տեսարան:

Իսկ Լոս Անջելեսի Վերադաս դատարանի դատավորը պնդել է, որ դրանք «սարսափելի չեն, քանի որ ո’չ գրաֆիկական են, ո’չ էլ` կրքեր բորբոքող»:

Ջեքսոնի իրավապաշտպանները նաեւ ցանկանում են ցուցադրել փոփ արքայի վերջին տեսաձայնագրություններ` ապացուցելու համար, որ նա լի էր եռանդով:

Իսկ Մյուրեյի դատապաշտպանները դրանք համարում են մոնտաժված և ապակողմնորոշող:

Եթե Մյուրեին մեղավոր ճանաչեն, ապա նրան սպառնում է 4 տարվա ազատազրկում: