Քլինթոնը տեղեկություններ է պահանջել "Էրգենեքոնի" վերաբերյալ

ԱՄՆ պետքարտուղար Հիլարի Քլինթոնը 2009 թվականին Ստամբուլից տեղեկություններ է պահանջել «Էրգենեքոն» ընդհատակյա կազմակերպության ռազմական եւ պաշտոնական կարգավիճակի վերաբերյալ. տեղեկացնում է թուրքական «Թարաֆ» թերթը` վկայակոչելով WikiLeaks-ի փաստաթղթերը:

Պետքարտուղարին հետաքրքրել է Թուրքիայի զինվորականություն, կառավարություն եւ «Էրգենեքոն» եռանկյունին: Նա, ընդհանուր առմամբ, 19 հարց է ուղղել: Օրինակ` որքանո՞վ է  Թուրքիայի գլխավոր շտաբը ներգրավված եղել կառույցում, այն ի՞նչ դիրքորոշում ունի հետաքննության հարցում, արդյո՞ք գաղտնի բանակցություններ է վարել, եթե այո, ապա ինչպե՞ս:

Ինչ վերաբերում է Թուրքիայի վարչապետ Ռեջեփ Թայիփ Էրդողանին եւ «Արդարություն եւ զարգացում» կուսակցությանը, Քլինթոնը հետաքրքրվել է, թե որքանո՞վ է ծանրակշիռ եղել նրանց դեմ հեղաշրջման փորձը, եւ արդյո՞ք հեղաշրջումը նախապատրաստվել է քաղաքական թշնամիներին վերացնելու համար: Բացի այդ` ինչքա՞ն պետք է Էրդողանը միջամտի գործընթացին, արդյոք «Էրգենեքոնի» փաստաբանները վստահելի՞ են եւ նրանց հնարավոր չէ՞ կաշառել եւ այլն: