300 հազար քուրդ դարձել է Սիրիայի քաղաքացի

Սիրիայի նախագահ Բաշար ալ Ասադը քաղաքացիություն է շնորհել երկրի հյուսիսարևելքում ապրող 300 հազար քրդերի. տեղեկացնում է սիրիական «Սանա» պետական հեռուստաալիքը։

Քրդերը Սիրիայի ամենախոշոր ազգային փոքրամասնությունն են և կազմում են երկրի բնակչության 10%-ը, սակայն նրանց մեծ մասը տասնամյակներ շարունակ քաղաքացիություն չի ունեցել։

Նախագահ Ասադի որոշումն ուղղված է զանգվածային ժողովրդական ելույթները մեղմելուն։ Հակակառավարական բողոքի ցույցերը սկսվել են մարտի 18-ին Դերաայում, այնուհետև տարածվել ողջ երկրով մեկ։ Անցյալ շաբաթ երկրի հյուսիսարևելքում տեղի ունեցած բողոք ցույցերին առաջին անգամ մասնակցել են նաեւ քրդերը։