Ինֆորմացիոն քաղց` սեռական հարցերի վերաբերյալ

Վերջերս մեծ աղմուկ էր բարձրացել այն տեղեկատվությունը, թե հայաստանցիներն առաջին տեղում են Google-ում porno բառի որոնման հաճախությամբ: Հայաստանին հաջորդում են Թուրքիան, Վրաստանը, Ռուսաստանը:

Այսօր լրագրողների հետ հանդիպման ժամանակ սեքսապաթոլոգ Վրեժ Շահրամանյանը նշեց, որ վերը նշված երկրները սեքսուալ մշակույթի տեսանկյունից խիստ տարբեր են, եւ հարց է առաջանում, թե ինչպե՞ս  է կատարվել այդ հետազոտությունը:

Սակայն եթե իրականում այդ ցուցանիշով Հայաստանն առաջին տեղում էլ չէ, փաստ է, որ տեղացիները ակնհայտորեն շատ են օգտվում ինտերնետից` նման բովանդակության տեղեկություններ գտնելու համար: Ո՞րն է պատճառը:

«Պատճառներից մեկը թերեւս այն է, որ մեր երկրում սեքսուալ առողջության վերաբերյալ քննարկումները այնքան էլ պատշաճ մակարդակով չեն արվում»,-  նշեց Վ. Շահրամանյանը` հավելելով, որ հիմնականում հենց ինֆորմացիոն քաղցն է ստիպում մարդկանց իրենց հուզող հարցերի պատասխանը գտնել ինտերնետում, որը, սակայն, լի է ապատեղեկատվությամբ:

Սեքսապաթոլոգի խոսքերով` մասնագիտական փորձը ցույց է տալիս, որ երիտասարդների եւ հատկապես դեռահասների համար սեռական առողջության ու կյանքի մասին տեղեկության աղբյուրներն են հիմնականում փողոցը, ինտերնետը եւ ընկերական միջավայրը: Խիստ հազվադեպ է լինում, երբ երիտասարդները մասնագիտական գրականություն են կարդում: