Google-ը մեղադրում է Չինաստանին` Gmail-ը արգելափակելու համար

Google-ը մեղադրում է Չինաստանի կառավարությանը` Gmail էլեկտրոնային փոստային ծառայությունը արգելափակելու համար: Վերջին մեկ ամսվա ընթացքում չինացի օգտագործողները  Gmail մուտք գործելու դժվարություններ ունեն, նույնիսկ մի քանի արտասահմանցի լրագրողներ բողոքել էին, թե իրենց փոստերի վրա հարձակում է եղել:

Ինչպես գրում է «Թելեգրաֆը», այս խնդիրը համընկել է իշխանությունների կողմից ինտերնետը վերահսկելու արշավի ակտիվացման հետ, որը սկսվել էր Միջին Արեւելքում հեղաշրջումներից, ինչպես նաեւ Չինաստանում սկսված` նմանատիպ «Ժասմին» հեղափոխությունից հետո:

Google-ը հայտարարել է, թե իր մասնագետները որեւէ տեխնիկական խնդիր չեն հայտարաբերել Gmail-ի գլխավոր կայքում. «Չինաստանի կառավարությունն է արգելափակել կայքը եւ այնպես արել, թե իբր խնդիրը Gmail-ի հետ է կապված»:

Երկու շաբաթ առաջ Google-ը հայտարարել էր նաեւ, որ նկատել են, թե Չինաստանում իրենց օգտատերերին ուղղված հարձակումներ են լինում, որոնց դրդապատճառը կարող է քաղաքական լինել:

Google-ը որոշել է փակել իր հիմնական կայքը Չինաստանում եւ այն տեղափոխել Հոնգ Կոնգ այն բանից հետո, երբ 2009-ի վերջին սկսվեցին չինացի հաքերների հարձակումները: Նրանք գողացել էին Google-ի մի քանի կարեւոր կոդերը, որոնց միջոցով կարողացել էին մուտք գործել Չինաստանի մարդու իրավունքների պաշտպանությամբ զբաղվող փաստաբանների փոստերը:

Չինաստանի արտգործնախարարությունը անմիջապես չի արձագանքել Google-ի այս հայտարարությանը: Սակայն համակարգչային փորձագետները նշել են, որ Չինաստանը գրաքննության նոր մեխանիզմներ է մշակել` չինացի օգտագործողների «աշխարհով մեկ ցատկերը» կանխելու համար:

Մինչ այժմ ինտերնետ օգտագործողները, այդ թվում` չինական մեծ ընկերությունները հիմնադրել են իրենց սեփական ցանցերը, որոնք օգնում են խուսափել գրաքննությունից եւ գաղտնի ինֆորմացիա փոխանակել: Սակայն մի շարք ընկերությունների ստեղծած «վիրտուալ գաղտնի ցանցերը» անցյալ շաբաթվանից այլեւս չեն գործում: