Ազատ տնտեսական գոտիները Հայաստանի համար չեն

ԱԺ ՀՅԴ խմբակցության անդամ Արա Նռանյանը վերապահումով է մոտենում Հայաստանում ազատ տնտեսական գոտիների ստեղծման հարցին:

Ըստ նրա` երբ երկրում իշխում են կոռուպցիան, հովանավորչությունը, երբ ինչ-որ մեկին կարելի է անել այն, ինչ մյուսներին չի կարելի, ապա այդ պայմաններում ազատ տնտեսական գոտիներից օգտվելու են նրանք, ովքեր կարժանանան կառավարության բարյացակամությանը:

«Ազատ տնտեսական գոտիները շատ հնարավոր է` դառնան փակ տարածք, որտեղ, իրավական հիմքերը պահպանելով, իրենց ազատ գործունեությունն իրականացնեն մարդիկ, ովքեր այսօր աշխատում են ընդհանուր դաշտում եւ խուսափում են հարկերից: Այսինքն` այս պայմաններում, երբ Հայաստանը դարձել է մի խումբ մարդկանց փող աշխատելու վայր, ազատ տնտեսական գոտին էլ ավելի լավ պայմաններ է ստեղծելու այդ մի խումբ մարդկանց համար»,- նշեց պատգամավորը:

Ըստ նրա` ՀՀ-ում գործարար միջավայրն առանց այդ էլ բարենպաստ չէ: «Ոչ մի խոշոր, լուրջ ընկերություն այս 20 տարվա ընթացքում ներդրումներ չի իրականացրել այստեղ, այսինքն` Հայաստանի տնտեսությունը գրավիչ չէ, որպեսզի համաշխարհային ճանաչում ունեցող ընկերությունները գան ՀՀ»,- նկատեց պատգամավորը` հավելելով, որ լուրջ վերապահումներ ունի, այսպես կոչված` օտարերկրյա հայտնի կազմակերպությունների` միլիարդների հասնող ներդրումների հարցում: