Ֆուտբոլային շաբաթ

Անկասկած, մարզական շաբաթվա կարեւոր իրադարձությունը Հայաստան-Վրաստան եւ Ռուսաստան-Իրան ֆուտբոլի ազգային հավաքականների ընկերական հանդիպումներն էին:

Կիպրոսի Լիմասոլում Հայաստանի ընտրանին, չնայած խաղային ակնհայտ բարձր որակին, դաշտին տիրելու առավելությանը եւ հարվածների անհամեմատ մեծ քանակին,  զիջեց 1:2 հաշվով: Ինչեւէ, Վարդան Մինասյանը կարողացավ ստուգել իր թիմի ֆունկցիոնալ կարողությունները եւ խաղընկերների համագործակցությունը:

«Մրցաշրջանի այս ժամանակահատվածի համար նորմալ եմ գնահատում մեր խաղը: Միակ մտահոգիչ տեղը պաշտպանությունն է. խոսքն ընդհանուր թիմային պաշտպանության մասին է,- խաղից հետո ասել է Հայաստանի հավաքականի գլխավոր մարզիչը:- Պետք է առանձնացնել հատկապես 2-րդ խաղակեսը, որն, ինչպես ասում են, «2-րդ շնչառությամբ» խաղացինք: Նույնիսկ անփորձ ֆուտբոլիստներն անձնազոհ ու համարձակ խաղ էին ցուցադրում»:

Իսկ Հենրիխ Մխիթարյանը, ում պոտենցիալ արժեքը բրիտանացի փորձագետները 20 մլն ֆունտ են գնահատում, հանդիպումից հետո ասել էր.  «Ճիշտ է, ինչ-որ տեղ զգացվեց Ռոբերտի, Յուրայի եւ Կառլենի բացակայությունը, սակայն եթե ազգային հավաքական է, ապա պետք է կարողանանք փակել նման դիրքերը: Մենք ինքներս նման դեպքերում պետք է ամեն ինչ անենք՝ նրանց պակասը լրացնելու: Կարծում եմ՝ պարտությունը դաս կլինի, որպեսզի մարտին կայանալիք խաղում ավելի հավաքված լինենք»:

Միակ գոլի հեղինակ դարձած Էդգար Մանուչարյանը, ով 65-րդ րոպեին չվրիպեց նշանակետից, ասել է. «Մարզիչն ինձ նախապես էր վստահել 11 մետրանոցն իրացնելու իրավունքը: Ամեն օր աշխատում եմ, որպեսզի մինչեւ մարտ ամիսը լավ վիճակում լինեմ»:

Մինչ մեր ֆուտբոլիստներն ու մարզիչը մտածում  են ուղղել սխալները եւ դասեր քաղել պատահածից` Ռուսաստանի հավաքականում իսկական իրարանցում է:

Իրանի ընտրանուց պարտություն կրելուց հետո` 0:1, Ռուսաստանի հավաքականի ավագ Անդրեյ Արշավինն ասել է. «Մենք վատ էինք խաղում, այսպիսի ֆուտբոլով մենք անելիք չունենք Եվրոպայի առաջնությանը,  նույնիսկ Հայաստանում ոչնչի վրա հույս դնել չենք կարող: Աբու Դաբիում տեղի ունեցած խաղից հետո անպատեհ  կհնչի, բայց Ռուսաստանի հավաքականը ամենեւին էլ Հայաստանի հավաքականին չպիտի հավասարվի»:

Այս թեւաթափ անող եւ միաժամանակ խայթող խոսքը չպետք է անպատասխան մնա:

Հայաստանի հավաքականն ի զորու է  հաղթանակ տոնել եւ դրանով ապացուցել, որ Ռուսաստանը Հայաստանի հավաքականին չի կարող հավասարվել: Դա է ապացուցում մեր տղաների պատրաստակամությունը:

Ռուսաստանի հավաքականի   գլխավոր մարզիչ Դիկ Ադվոկատը Իրանի ընտրանուց կրած պարտությունից հետո իր հետեւություններն է արել. «Տեխնիկական հնարքներով  իրանցիներն ավելի նման են Հայաստանին, որի հետ մենք պետք է խաղանք: Երեւանում կհաղթի ուժեղագույնը»:

Իսկ ԽՍՀՄ հավաքականի նախկին պաշտպան Եվգենի Լովչեւն ասել  է. «Ցավալի է, որ հավաքականը վերածվել է փակ ակումբի, որտեղ հրավիրվում են միայն իրար ծանոթ մարդիկ: Նրանք գիտեն, որ, անկախ նրանից, թե ինչպես իրենց կդրսեւորեն խաղադաշտում, միեւնույն է, հրավեր կստանան, դա թիմ չէ, այլ ճահիճ: Ամբողջ երկրով խայտառակվելու վախը միակ  միջոցն է` սթափեցնելու մեր հավաքականին»:

Ֆուտբոլային շաբաթվա ամենակարեւոր նորություններից մեկն էլ  այն էր, որ ազգային հավաքականների ֆուտբոլիստները 2012-ին ստիպված են ընտրություն կատարել նույն ժամանակահատվածում անցկացվող երկու առաջնությունների միջեւ. նրանք պետք է մասնակցեն կա'մ Եվրոպայի առաջնությանը, կա'մ Լոնդոնի օլիմպիական խաղերին: Իսկ մինչ 2012 թ. Եվրոպայի եզրափակիչը, մարտի 26-ին Երեւանում հետաքրքիր եւ լարված հանդիպում է սպասվում:

Ի դեպ, Հայաստան-Ռուսաստան խաղի տոմսերի վաճառքը կսկսվի  մարտի 10-ից:

ԱՆԻ ՄԵՋԼՈՒՄՅԱՆ