Գյումրեցիները փող են հավաքել կառավարության համար

Գյումրիում եւ Նոյեմբերյանում մոտ 40 հազար մարդ իր բողոքն է արտահայտում վրացական պետհամարանիշներով մեքենաների մաքսազերծման նոր օրենքի դեմ:

Երեկ «Ժառանգություն» կուսակցության պատգամավորներից մի քանիսը եղել են Գյումրիում եւ աջակցել են այդ մարդկանց` օգտվել իրենց Սահմանադրական իրավունքից, այն է` ակցիա կազմակերպելուց:

Այդ մասին այսօր խորհրդարանական ճեպազրույցի ժամանակ ասաց պատգամավոր Ստյոպա Սաֆարյանը: Նրա խոսքերով` երեկ Գյումրիում պայթյունավտանգ իրավիճակ է եղել. բազմաթիվ ցուցարարներ ու ոստիկաններ են հավաքվել:

Շուրջ 200 մեքենայով ավտոշքերթ է եղել դեպի մաքսային ծառայություն, որտեղ հանձվել է դիմում-նամակ` առաջարկություններով:  

Պատգամավոր Զարուհի Փոստանջյանն էլ պատմեց, որ ցուցարարները հանգանակություն են կազմակերպել` ասելով, թե կառավարության համար փող են հավաքում, որ այն իրենց` ժողովրդի գրպանը չմտնի: Ցուցարարները լիազորել են Փոստանջյանին` գումարն անձամբ հանձնել վարչապետին:

Ի դեպ, հանգանակությանը մասնակցեցին նաեւ ճեպազրույցին ներկա լրագրողներ: