Վարդանիկի մուրազը կատարվեց

Երեկ՝ ժամը 15:00 սահմաններում, Հայաստանի ոստիկանության քրեական հետախուզության գլխավոր վարչության աշխատակիցները Գյումրի քաղաքի Շառլ Ազնավուրի հրապարակում գտնվող «Բյուզարդ» ռեստորանից ոստիկանության Շիրակի մարզային վարչություն բերման են ենթարկել մոտ 25 անձի:

Ըստ  ֆոտոլրագրող Գագիկ Շամշյանի՝ նշված անձանց մեջ եղել են հայտնի օրենքով գողեր  «Զավ» մականունով 1968 թ. ծնված Անդրանիկ Սողոյանը, 1970 թ. ծնված Գևորգ Մելիքյանը`«Օշականցի Գևորիկ», 1973 թ. ծնված Սուրեն Ավետիսյանը`«Պավլուշի տղա Սուրո», 1964 թ. ծնված Ալեքսանդր Մակարյանը`«Ալո»-ն, 1973 թ. ծնված Սամվել Հարությունյանը` «Մանեթի տղա Սամո», 1979 թ. ծնված Ռաֆայել Խոյեցյանը` «Աֆուլիկը»  և 1984 թ. ծնված՝ Գյումրիի քաղաքապետի որդի Սպարտակ Ղուկասյանը:

Բոլորը ենթարկվել են խուզարկման և կեսգիշերին ստորագրությամբ ազատ են արձակվել: Շիրակի մարզային վարչությունում նյութեր են նախապատրաստվում:

Այսպիսով՝ կարելի է ասել Գյումրիի քաղաքապետ Վարդանիկի մուրազը կատարվեց. տղայի անունը հիշատակվում է օրենքով գողերի անունների կողքին: