Քաղաքապետարանում տասը չափում են, մեկը` կտրում

Փետրվարի 1-ից մինչեւ հունիսի 1-ը միջքաղաքային էլեկտրագնացքներից օգտվելու դեպքում ցերեկային ուսուցման ուսանողներին կտրամադրվի 25 տոկոս զեղչ:

«Հարավկովկասյան երկաթուղի» ՓԲԸ-ի հասարակության հետ կապերի ծառայության պետ Վահե Դավթյանը ԵՐԿԻՐ-ի հետ զրույցում ասաց` գաղտնիք չէ, որ իրենց դիրքորոշումը սոցիալամետ է, եւ այդ քայլով ոչ միայն ուղեւորահոսքն են ավելացնում, այլ նաեւ որոշակի պարտականություններ են կատարումը ՀՀ քաղաքացիների հանդեպ:

Հարցով` արդյոք չի՞ պատրաստվում նմանատիպ նախաձեռնությամբ հանդես գալ Երեւանի քաղաքապետարանի տրանսպորտի վարչության տրամադրության տակ գտնվող մետրոպոլիտենը, դիմել էինք համապատասխան վարչություն:

«Կարեն Դեմիրճյանի անվան Երևանի մետրոպոլիտեն» ՓԲԸ-ն աշխատում է վնասով, և մետրոպոլիտենի շահագործումից առաջացող վնասների փոխհատուցման նպատակով ընկերության գործունեությունը սուբսիդավորվում է ՀՀ պետական բյուջեից»,- նշված էր պատասխանում, որը ենթադրում էր, թե ուսանողների համար մետրոպոլիտենից օգտվելու զեղչեր չեն լինի: