Ինչո՞ւ ամեն անգամ Գրողների միությունը

Հասարակական կազմակերպություններին պետության կողմից աջակցություն ցուցաբերելու գործընթացի հետ կապված հարցեր են հնչեցվել երեկ ԼՂՀ ֆինանսների նախարար Սպարտակ Թեւոսյանի մամուլի ասուլիսի ժամանակ:

Լրագրողներին հետաքրքրել է, թե ինչու ամեն տարի ԼՂՀ գրողների միությանը տրվող ֆինանսական աջակցության չափը մի քանի անգամ գերազանցում է մյուս ՀԿ-ներին եւ ստեղծագործական միություններին հատկացվող գումարները: Սպարտակ Թեւոսյանը, իհարկե ,այդ հարցի պատասխանը չտվեց, այլ ասուլիսին ներկա՝ կառավարության աշխատակազմի տեղեկատվության եւ հասարակայնության հետ կապերի վարչության պետին առաջարկեց տեղեկացնել ՀԿ-ներին, որ ներկայացնեն ծրագրեր, որոնցից դրական եզրակացություն ստացողներին էլ կտրամադրվի ֆինանսական աջակցությունը: «Այսօրվա դրությամբ ոչ մի հասարակական կազմակերպության դեռ գումար չենք հատկացրել»,- տեղեկացրել է ֆինանսների նախարարը:

Իսկ թե ինչու է նախապատվությունը միշտ տրվում գրողների միությանը՝ հարցի պատասխանը ոչ ոք դեռ չի տվել, չնայած հարցը շատ է հնչեցվել:

Հիշեցնենք, որ գրողների միության նախագահը Վարդան Հակոբյանն է, ով նաեւ ղեկավարում է «Գրիգոր Նարեկացի» մասնավոր համալսարանը: