ԱՊՊԱ-ն եւ ավտովթարները

Այսօր` ժամը` 11:30-ի սահմաններում, Թումանյան-Տերյան փողոցների խաչմերուկում միմյանց են բախվել «Տոյոտա Կոռոլա» մակնիշի եւ «Միթսուբիշի Պաջեռո» մակնիշի ավտոմեքենաները: Բախման հետեւանքով «Տոյոտա Կոռոլա» ավտոմեքենան դուրս է եկել երթեւեկելի  մասից, հարվածել է մայթեզրի երթեւեկությունը կարգավորող ցուցանակին, որն ընկել է մեքենայի վրա: Զոհեր եւ վիրավորներ չկան: Ավտովթարից անցել էր ավելի քան 1 ժամ, բայց ԱՊՊԱ-ի գործակալները դեռ չկային:

Ի դեպ, հունվարի 1-ից, մինչեւ օրս հանրապետությունում գրանցվել է 521 ավտովթար` նյութական վնասով: 12.200 սոցիալապես անապահով վարորդներ դուրս են բերել իրենց մեքենաները հաշվառումից: ԱՊՊԱ-ի աշխատանքից դժգոհում են բոլորը: Վերջին շրջանում երթեւեկության խաթարման պատճառը ԱՊՊԱ-ի գործակալներն են: Օրենքի համաձայն, վթարված մեքենաները, դուրս չպիտի բերվեն փողոցի երթեւեկելի մասից, քանի դեռ ԱՊՊԱ-ի գործակալները չեն արձանագրել վթարի մանրամասները: Իսկ նրանք շատ հաճախ ուշանում են եւ պատճառ դառնում ծանր խցանումների: Երեկ երեկոյան Երեւանի գազանանոցի մոտ վթարվել էին երկու մեքենա: Դեպի Ավան, Նորքի զանգված ճանապարհն այնպես էր խցանվել, որ այն հնարավոր եղավ անցնել երեք ժամում: Նույնն էր վիճակն այսօր առավոտյան, այս անգամ Ջրաշհարհի դիմաց` Նոր Նորքից Շրջանային իջնող ճանապարհին: