Զորակոչից խուսափողները կվճարեն առավելագույնը 1 մլն 800 հազար դրամ

Դեկտեմբերի 8-ին Ազգային ժողովն երկրորդ ընթերցմամբ եւ ամբողջությամբ ընդունեց «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրենքում փոփոխություն կատարելու մասին կառավարության հեղինակած օրինագիծը: Ըստ այդմ, օրենքի գործողության ժամկետը երկարաձգվեց մինչեւ ընթացիկ տարվա նոյեմբերի 1-ը, ինչը հնարավորություն կընձեռնի մինչեւ 2010թ.-ի աշնանային զորակոչը 27 տարին լրացած, պարտադիր զինվորական ծառայությունից խուսափած քաղաքացիներին սահմանված ժամկետում մուծել համապատասխան վճարը, որից հետո կդադարեցվի նրանց  նկատմամբ հարուցված քրեական հետապնդումը:

18 տարեկանից մինչեւ 27 տարեկան բոլոր զորահավաքներից խուսափելու համար ընդհանուր առավելագույն վճարի գումարը կազմում է 1 մլն 800 հազար դրամ: Առանձին կատեգորիաների համար նախատեսված են նաեւ զեղչեր, մասնավորապես, եթե այդ ընթացքում սահմանված կարգի խախտմամբ պարտադիր զինվորական ծառայություն չանցած քաղաքացին սովորել է բուհում է, կամ  երկու երեխա է ունեցել, կամ ծնողներից մեկը հաշմանդամի կարգ ունի եւ այլն:

Նշենք, որ օրենքը գործում է 2003-ից, եւ մինչ այժմ շուրջ 5 հազար մարդ օգտվել է օրենքի գործողությունից: