Պետությունը պետք է լինի ազգային, իշխանությունները` ժողովրդավար

«Երկիրը պետք է զարգանա` չզիջելով: Եվ չզիջելու համար պահանջվում է զարգանալ: Սրա համար անհրաժեշտ է համազգային ներուժի կուտակում և դրա արդյունավետ կիրառում»,- այսօր լրագրողների հետ հանդիպման ժամանակ ասաց ՀՅԴ գերագույն մարմնի ներկայացուցիչ Արմեն Ռուստամյանը:

Նրա խոսքերով` պետությունը պետք է լինի ազգային, իսկ իշխանությունները ժողովրդավար: Եվ հենց այս միջավայրը պետք է ձեւավորել, ինչը Հայաստանում չկա: Ժողովրդավարության ունիվերսալ բաղադրիչներ կան, որոնք կիրառելի են արևմտյան երկրներում, սակայն, չգիտես ինչու, դրանք չեն կիրառվում Հայաստանում:

Դեկտեմբերի 9-ին ՀՅԴ կուսակցությունը կազմակերպում է «Ժողովրդավարության մարտահրավերները և պետականաշինությունը Հայաստանում» միջազգային խորհրդաժողովը: Ելույթ են ունենալու հայտնի քաղաքական գործիչներ և փորձագետներ Ավստրիայից և Հունաստանից: Զեկույցներ են ներկայացնելու նաև ՀՀ Սահմանադրական Դատարանն ու Մարդու իրավունքների պաշտպանի գրասենյակը:

Խորհրդաժողովի ժամանակ խոսվելու է ժողովրդավարության կարեւորության մասին, անդրադարձ է լինելու Հայաստանում ժողովրդավարության ներկայիս իրավիճակին, առաջարկներ են հնչելու մեզ մոտ իրավիճակը շտկելու վերաբերյալ: