Թևանյանի շուրջ իրավական զարգացումները նախընտրական բնույթ ունեն. Հակոբ Բադալյան

«Հայաստան» դաշինքի նախկին պատգամավոր, այժմ «Բարգավաճ Հայաստան» կուսակցության ընտրական ցուցակի երկրորդ համար Անդրանիկ Թևանյանի շուրջ ծավալվող իրավական զարգացումները քաղաքական վերլուծաբան Հակոբ Բադալյանը կապում է բացառապես նախընտրական գործընթացների հետ։ Այս մասին նա գրառում է կատարել սոցիալական ցանցի իր էջում։

Նա փորձում է պարզել՝ այս իրավիճակից ով է դուրս գալու քաղաքական շահաբաժիններով։

«Միաժամանակ «կասկածելի» է, թե հատկապես ի՞նչ էֆեկտ է դա ունենալու: Ավելի շուտ՝ ո՞ւմ համար է դա ունենալու ավելի մեծ էֆեկտ: Էֆեկտ ունենալու է այդ գործողության ակնհայտ քաղաքական ցուցումը տված վարչապետ Փաշինյանի՞, թե՞ այդ գործողության թիրախում հայտնված ուժի՝ Թևանյանի, նրա առաջնորդած «Մայր Հայաստան» կուսակցության կամ ԲՀԿ-ի համար, որի ծրագրային ներառումով է «Մայր Հայաստանը» ներգրավված խորհրդարանի ընտրության պրոցեսին»,– գրել է նա։

Միևնույն ժամանակ Բադալյանը նշել է, որ գործող իշխանության կողմից վարչական ու իրավական գործիքների կիրառումն ընտրարշավի փուլում կանխատեսելի էր, և հավասար պայմանների մասին պատկերացումները չափից դուրս միամիտ կլինեին։

«Իհարկե ավելորդ է խոսել այն մասին, որ ընտրապայքարը, մեղմ ասած, անհավասար է: Մտածել, թե այն լինելու էր հավասար և Նիկոլ Փաշինյանը չէր օգտագործելու իշխանության լծակները, մեղմ ասած, կլիներ չափից դուրս միամիտ: Հետևաբար իրավիճակը հանգում է այն կետին, թե ընդդիմությունը որքանով է կարողանալու հմուտ լինել այդ անհավասարության դրսևորումներն իր օգտին շրջելու հարցում: Իսկ դա իհարկե քաղաքականության արվեստի կարևոր հատկանիշներից է»,– շարունակել է Բադալյանը։

Ամփոփելով միտքը՝ վերլուծաբանն ընդգծել է, որ իշխանության կողմից կիրառվող այս ճնշումները բացառել կամ ամբողջությամբ կանգնեցնել հնարավոր չէ։ Հետևաբար, ըստ նրա, ընդդիմադիր ուժերի միակ տակտիկական քայլը պետք է լինի հարվածը սեփական էներգիայի վերածելն ու իշխանության հաշվարկները տապալելը։