Իրանի խորհրդարանի խոսնակը հրաժարական է տվել

Իրանի խորհրդարանի խոսնակ Մոհամմադ Բաղեր Ղալիբաֆը հրաժարական է տվել և լքել Միացյալ Նահանգների հետ բանակցությունների պատասխանատուի պաշտոնը։

Այս մասին գրում է The Times of Israel-ը՝ հղում անելով իսրայելական 12-րդ ալիքի հրապարակած տվյալներին։

Ըստ որոնց՝ Ղալիբաֆը հրաժարվել է պաշտոնից՝ իր քայլը հիմնավորելով Իսլամական հեղափոխության պահապանների կորպուսի գեներալների «մեծացող միջամտությամբ»։

Վեճը, ըստ հեռուստաալիքի աղբյուրների, գագաթնակետին է հասել Հորմուզի նեղուցում լարվածությունը մեղմելու Քաթարի առաջարկի պատճառով, որը թույլ կտար իրանական 20 նավի անցնել ջրային ճանապարհով՝ Արաբական ծոցի նավահանգիստներից եկող 20 նավի դիմաց նույնը անելու փոխարեն։

Առաջարկն, ի վերջո, մերժել են իրանցի պաշտոնյաները, այդ թվում՝ Իրանի արտաքին գործերի նախարար Աբբաս Արաղչին։

Նա ավելի վաղ X-ի էջում գրել էր․

«Իրանում չկան ո՛չ արմատականներ, ո՛չ էլ չափավորներ ․ մենք բոլորս «իրանցիներ» և «հեղափոխականներ» ենք։ Ժողովրդի և կառավարության երկաթյա միասնության, ինչպես նաև հեղափոխության գերագույն առաջնորդին լիակատար ենթարկվելու շնորհիվ մենք կստիպենք հանցավոր ագրեսորին զղջալ իր գործողությունների համար։ Մի Աստված, մեկ առաջնորդ, մեկ ժողովուրդ և մեկ ուղի՝ Իրանի հաղթանակի ուղին, որը կյանքից թանկ է»։