ՄԱԿ-ի Գլխավոր ասամբլեայում ելույթում Ալիևը խոսել է խաղաղության բանակցությունների և ՀՀ «կապիտուլյացիայի» մասին

Ադրբեջանի նախագահ Իլհամ Ալիևը, ելույթ ունենալով ՄԱԿ-ի Գլխավոր ասամբլեայի 80-րդ նստաշրջանում, կիսվել է Հայաստանի հետ խաղաղության բանակցությունների վերաբերյալ իր մտքերով, հաղորդում են ադրբեջանական լրատվամիջոցները։

Նրա խոսքով՝ Ադրբեջանը «առաջ է քաշել միջազգային իրավունքի վրա հիմնված հինգ հիմնարար սկզբունքներ և ներկայացրել է խաղաղության պայմանագրի նախագիծ»։

«Այնուհետև մեր նախաձեռնությամբ սկսվել է նախագծի տեքստի շուրջ բանակցային գործընթացը, որը տևել է 2022 թվականի հոկտեմբերից մինչև 2025 թվականի ամառը։ Չնայած տարբեր սադրանքներին, բանակցությունները տվել են դրական արդյունքներ, քանի որ դրանք անցկացվել են բացառապես երկկողմանի հիմքերով՝ առանց որևէ արտաքին միջամտության», - հայտարարել է Ալիևը։

Նա նաև նշել է, որ «2020 թվականի նոյեմբերի 10-ը պատմության մեջ մտավ որպես Հայաստանի կապիտուլյացիայի և Ադրբեջանի տարածքային ամբողջականության վերականգնման օր՝ գրեթե 30 տարվա օկուպացիայից հետո»։

«Հաղթական պատերազմից անմիջապես հետո Ադրբեջանը հայտարարել է Հայաստանի հետ հարաբերություններում նոր էջ բացելու պատրաստակամության մասին՝ հիմնվելով տարածքային ամբողջականության և ինքնիշխանության փոխադարձ ճանաչման վրա», - ասել է Ալիևը։