Իսրայելի ԶՈւ-ն վերահսկում է Գազայի հատվածի տարածքի 77%-ը. Al Jazeera

Ներկայումս Իսրայելի զինված ուժերը փաստացի վերահսկում են Գազայի հատվածի ամբողջ աշխարհագրական տարածքի 77 տոկոսը, հայտնում է քաթարական Al Jazeera հեռուստաալիքը՝ հղում անելով Գազայի հատվածի մամուլի ծառայությանը։

«Դա ձեռք է բերվում ուղղակի ցամաքային ներխուժումների և բնակելի և քաղաքացիական շրջաններում օկուպացիոն ուժերի տեղակայման, ինտենսիվ կրակի վարման միջոցով, որը թույլ չի տալիս պաղեստինցի քաղաքացիներին հասանելի լինել իրենց տներին, շրջաններին, հողերին և գույքին, կամ բռնի տեղահանման անարդար քաղաքականության միջոցով», - ասվում է հայտարարության մեջ։

Գերատեսչությունը ՄԱԿ-ին և միջազգային հանրությանը կոչ է արել միջոցներ ձեռնարկել իսրայելական էքսպանսիան դադարեցնելու համար։

«Շարունակվող ցեղասպանությունը, էթնիկ զտումները, գաղութատիրությունը, ագրեսիան և Գազայի հատվածի գերակշիռ մասի նկատմամբ օկուպացիոն վերահսկողությունն արտացոլում են Իսրայելի քաղաքական կամքը՝ ուժով պարտադրելու «վերջնական լուծումը», ինչը բոլոր միջազգային օրենքների և նորմերի կոպտագույն խախտում է», - ասվում է Գազայի կառավարության հայտարարության մեջ։