Ռուսական զորքը վերահսկողության տակ է վերցրել ԴԺՀ-ի Բերյոզովկա բնակավայրը. ՌԴ ՊՆ

Ռուսական զորքերի «Կենտրոն» խմբավորման ստորաբաժանումներն ազատագրել են ԴԺՀ-ի Բերյոզովկա բնակավայրը։ Այս մասին հայտնում է ՌԴ պաշտպանության նախարարությունը։

Նշվում է, որ «Արևմուտք» ուժերի խմբավորման ստորաբաժանումները բարելավել են իրենց մարտավարական դիրքերը։ «Հարավային» զորախմբի զինվորականները նույնպես գրավել են առավել շահեկան գծեր ու դիրքեր։

Փետրվարի 7-ին պաշտպանության նախարարությունը հայտնել էր ԴԺՀ-ի Ձերժինսկ քաղաքի գրավման մասին։ Նշենք, որ նախորդ շաբաթվա վերջից ռուսական զորքերը վերահսկողության տակ են վերցրել հինգ բնակավայր։

Հիշեցնենք՝ 2022 թվականի փետրվարի 24-ին սկսվեց Ռուսաստանի և Ուկրաինայի միջև զինված հակամարտություն՝ Ռուսաստանի զինված ուժերի կողմից Ուկրաինայի տարածք ներխուժմամբ։ Մոսկվայի ժամանակով մոտավորապես ժամը 05:30-ին Ռուսաստանի նախագահ Վլադիմիր Պուտինը հայտարարեց Ուկրաինայի «ապառազմականացման և դենացիֆիկացման հատուկ գործողության» մասին, որից րոպեներ անց հրթիռային հարվածներ սկսվեցին Ուկրաինայի տարբեր վայրերում։ Մարտական գործողություններն ընթանում են մինչ օրս։