Ռուսաստանը բազմիցս օգնել է Հայաստանին, և դրան կա պատմական պատասխան․ Զախարովա

Հայաստանի հետ հարաբերություններում Ռուսաստանի մտադրությունների անկեղծության վերաբերյալ Երևանի կասկածներին կա պատմական պատասխան։ Ռուսաստանը բազմիցս օգնության է հասել, պաշտպանել է և ջանքեր է գործադրել արյունահեղությունը դադարեցնելու համար, РИА Новости-ին ասել է ՌԴ ԱԳՆ պաշտոնական ներկայացուցիչ Մարիա Զախարովան։

«Եթե Հայաստանում որևէ մեկը հարցեր ունի մեր մտքերի անկեղծության վերաբերյալ, կարծում եմ, որ դրա պատմական պատասխանը կա: Ռուսաստանի ղեկավարությունը և անձամբ Ռուսաստանի նախագահ Վլադիմիր Պուտինը բազմաթիվ անգամներ ջանքեր է ներդրել, որպեսզի այս տարածաշրջանում դադարեցվի արյունահեղությունը»,- ասել է Զախարովան։

«Դա շատ բան արժե։ Եվ սրանք այն անվերջ բլա-բլա-բլա, դատարկ խոսքերը, խոստումները չեն, որ ինչպես միշտ արևմտյան շատ երկրներ, տալիս են Հայաստանին, Երևանին, որ կպաշտպանեն, կօգնեն և այլն։ Եվ չգիտես ինչու նրանք պաշտպանում են Ռուսաստանից, որն իսկապես դադարեցրեց արյունահեղությունը, որն իսկապես ֆինանսական և տնտեսական օգնություն տվեց, փոխարենը ոչինչ չպահանջելով և չներկայացնելով ստրկական պայմաններ»,- ընդգծել է Զախարովան։

Արտաքին գործերի նախարարության պաշտոնական ներկայացուցիչն ուշադրություն է հրավիրել Ռուսաստանի կողմից ընդունված փախստականների թվի վրա։ 

«Եվ չենք ասել, թե ում փախստականներն են ավելի լավը կամ վատը, նրանք, ովքեր գալիս են Ուկրաինայի տարածքից, թե նրանք, ովքեր գալիս են Կովկասից, կյանքում նման բան չի եղել։ Միշտ ջերմություն, հյուրընկալություն, օգնության ձեռք և իսկական օգնության ձեռք է եղել, որը միշտ տվել է Ռուսաստանը, և ոչ թե ձեռք, որը բռունցք է պահել մեջքիդ հետևում»,- նշել է Զախարովան։

«Եվ ես իսկապես չեմ ուզում, որ հիմա Հայաստանի ժողովրդին ինչ-որ հակառուսական օրակարգ պարտադրվի տեղեկատվական տեխնոլոգիաների և ագրեսիվ հռետորաբանության շնորհիվ։ Մենք միշտ նրանց կողքին ենք լինելու, միշտ օգնելու ենք, միշտ բաց սրտով և մաքուր հոգով ենք վերաբերվելու Հայաստանին, այս երկրի ժողովրդին»,- եզրափակել է նա։