Մենք փաստացի մենակ ենք․ Հայաստանի իշխանությունը մեր երկիրը տանելու է թշնամու երախում տեղավորելու․ Նաիրի Հոխիկյան

Մեդիափորձագետ Նաիրի Հոխիկյանը գրում է.

«Ինչպես սպասվում էր, Հայաստանին դեմ առ դեմ, առանց միջնորդի բանակցության բերելուց հետո Ադրբեջանն անցավ հաջորդ փուլին' գործի մեջ ներքաշելով Թուրքիային։

Դա նշանակում է մեկ բան' թուրք-ադրբեջանական ոհմակի բերանում տեղավորել միայնակ մնացած Հայաստանը։

Այո, մենք հիմա լրիվ մենակ ենք։ Հայաստանի իշխանությունը հետեւողական կատարեց Արևմուտքի ու Ադրբեջանի պահանջները' թշնամանալ Ռուսաստանի հետ։ Հիմա փաստացի չկա հայ-ռուսական բարեկամական դաշնակցային հարաբերություն, ԱՄՆ -ն, Մեծ Բրիտանիան ու Ֆրանսիան խոսքերից բացի այլ բան չեն անում։ Դա պարզ է ի սկզբանե։ Եթե որևէ մեկին թվում է, թե Ֆրանսիան մեզ լուրջ զենքեր կտա, չարաչար սխալվում է։ Մի քանի զրահամեքենա կուղարկեն, ու խաղաղության մղումներով ամեն ինչ կավարտվի։

Մենք փաստացի մենակ ենք։ Ուզենք թե չուզենք, այդպես է, և այդ պարագայում Հայաստանի իշխանությունը մեր երկիրը տանելու է թշնամու երախում տեղավորելու»։