«Fly Arna» ավիաընկերության վերաբերյալ պարզաբանումներ են ներկայացվել

ՀՀ վարչապետի՝ ավիացիայի հարցով նախկին խորհրդական Հակոբ Ճաղարյանն անդրադարձել է «Fly Arna» ավիաընկերության վերաբերյալ մի քանի հարցերի։ 

Հրապարակումը ներկայացնում ենք ստորև․

«Վերջին մի շաբաթում հանրության ուշադրության կենտրոնում էր «Ֆլայ Առնա» ավիաընկերության, որպես ՀՀ հերթական «ազգային ավիափոխադրողի» փուչիկը պայթելու մասին թեման:

Ինձ բազմաթիվ լրագրողներ դիմել են տարատեսակ հարցերով: Որոնցից հիմնականները`

«Ֆլայ Առնայի» հայկական լինել-չլինելը, «Ազգային ավիափոխադրող» չկայանալու պատճառները: Այդ ընկերության ապագան Հայաստանում։

Պարզաբանումների և ամեն անգամ չկրկնվելու համար որոշեցի այս գրառմամբ ամեն ինչ պարզաբանել, գոնե իրավական տեսակետից:

«Ֆլայ Առնան» ՀՀ «ԱԶԳԱՅԻՆ ԱՎԻԱՓՈԽԱԴՐՈՂ» երբեք ՉԻ ԵՂԵԼ:

Համաձայն Քաղաքացիական Ավիացիայի Միջազգային Կազմակերպության (ICAO) ձևակերպման`

«Ազգային Ավիափոխադրողը» տվյալ երկրի միակ կամ հիմնական ավիափոխադրողն է, որը հանդիսանում է երկրի ավիացիոն փոխադրումների շուկայի կարգավորման ԱԶԳԱՅԻՆ ԳՈՐԾԻՔ (տես հղումը ICAO doc.9626)

«Ազգային Ավիափոխադրող» ՉԻ ՆՇԱՆԱԿՎՈւՄ վարչապետի, նախագահի, կամ որևէ այլ պաշտոնյայի հրամանագրով: Այդպես անվանելով ավիաընկերությանը, այն այդպիսին չի դառնում: Ինչպես բոլոր Հաղթանակ անունը կրողները հաղթանակ չեն, Համեստները` համեստ, Գեղեցիկները` Գեղեցիկ, ....

«Ազգային ավիափոխադրողը» երկարատև, մասնագիտական և որակյալ աշխատանքի, տվյալ երկրի ավիափոխադրումների շուկայում իր սպասարկած ծավալների շնորհիվ շուկայի կարգավորման վրա ազդեցություն գործելու հնարավորություն ՎԱՍՏԱԿԱԾ ավիաընկերության կարգավիճակի գնահատականն է: Ոչ թե անվանում:

Ինչին, այլ պատճառներից բացի, լոուքոստ մոդելով հասնել հնարավոր չի:

Հայկակա՞ն է արդյոք «Ֆլայ Առնա» ավիաընկերությումը: Չէ՞ որ նրա բաժնետոմսերի 51%-ը հայկական չեն:

ԱՅՈ, ավիաընկերությունը հայկական է: Այն գրանցված է ՀՀ-ում, գործում է ՀՀ-ում, աշխատում է ՀՀ օրենքներով, հարկերը վճարում է ՀՀ-ում....

Ապագայի մասին`

«Ֆլայ Առնան» «Էյր Արաբիա» ավիաընկերության 5-րդ դուստր ավիաընկերության փորձն է:

Նրանցից 2-ը` Մարոկկոյի և Եգիպտոսի մասնաճյուղերն աշխատում են անխափան: «Էյր Արաբիայի» օդանավերի մոտ 10% շահագործվում են այդ կենտրոններից:

Մյուս երկուսը` Նեպալի և Հորդանանի, դադարել են գործել:

Եվ, ըստ իմ շատ հավաստի տեղեկությունների, ո՜չ «երկրի արտաքին քաղաքական անկայուն իրավիճակի» պատճառով, ինչպես նշվում է բաց աղբյուրներում:

Ասեմ, որ այս ընկերության գործունեությանը ծանոթ լինելով իր ստեղծման առաջին օրվանից, հավաստիացնում եմ, որ ՈՉ ՄԻ սկանդալի մեջ ներքաշված չի եղել:

Եվ հույս հայտնեմ, որ էդ պատճառով Հայաստանից հեռանալու առիթ չի ունենա»։