կարևոր
2413 դիտում, 11 ամիս առաջ - 2023-08-17 13:34
Քաղաքական

ՄԱԿ-ի ԱԽ-ում քննարկումը Լաչինի միջանցքը բացելու վերաբերյալ պետք է միայն կոչ չլինի, հետևեն գործողություններ, այլապես արժեք չունի

ՄԱԿ-ի ԱԽ-ում քննարկումը Լաչինի միջանցքը բացելու վերաբերյալ պետք է միայն կոչ չլինի, հետևեն գործողություններ, այլապես արժեք չունի

ՄԱԿ-ի ԱԽ-ում ձևավորվել էր մթնոլորտ, որտեղ իրապես ներկայացվեց Արցախում ստեղծված իրավիճակը։

Այս մասին Tert.am-ի հետ զրույցում ասաց Արցախի ԱԺ ՀՅԴ խմբակցության պատգամավոր, արտաքին հարաբերությունների մշտական հանձնաժողովի նախագահ Վահրամ Բալայանը։

Նրա տպավորությամբ՝ ԱԽ նիստում ելույթ ունեցողների մեծամասնությունը շեշտեցին, որ Լաչինի ճանապարհը փակ է և Արցախում ստեղծվել է հումանիտար ճգնաժամ։

Սակայն, ԱՀ ԱԺ արտաքին հարաբերությունների մշտական հանձնաժողովի նախագահի կարծիքով՝ կարելի էր ավելի տեղին գնահատական տալ, արձանագրել ոչ թե խնդիրն, այլ՝ աղետը։

«Որոշումից զատ նաև պետք է գործողություն լինի։ Եթե ՄԱԿ-ի ԱԽ-ում պարզապես պետք է քննարկեն հարցը, որոշում չլինի և հետամուտ չլինեն այդ որոշումների կատարմանն, ապա այս նիստը որևէ արժեք չի ունենա։ Սակայն, եթե կա սրտացավություն, մտահոգություն Արցախում աղետը կանխելու վերաբերյալ, պետք է լինեն որոշակի քայլեր։ Ինձ թվում է՝ պատկերը դրական է, թե հետո ինչ քայլեր կլինեն, դա արդեն այլ հարց է»,- մատնանշեց Արցախի քաղաքական գործիչը։

Բալայանը նկատեց, որ ՄԱԿ-ի ԱԽ-ում խոսվել է նաև Բաքու-Ստեփանակերտ երկխոսության անհրաժեշտության մասին։ Պատգամավորի համոզմամբ՝ ՄԱԿ-ի ԱԽ քննարկումը Լաչինի միջանցքը բացելու հավաքական կոչ էր, բայց չկար խոսք այն մասին, թե ինչ կլինի, երբ Ադրբեջանն արհամարհի այս կոչը:

«ՄԱԿ անդամ երկրները հնարավորություն ունեն կոնկրետ գործողություններով ստիպել, որ Լաչինի ճանապարհը բացվի և մարդիկ ապրեն իրենց երկրում։ Մենք հենց այդ գործողությանն ենք սպասում»,-ասաց նա։

ՄԱԿ-ի ԱԽ-ում նիստին ՌԴ ներկայացուցիչը հայտարարեց, որ պետք է դադարեցնել Լաչինի միջանցքի արգելափակումը և օգտագործել մարդասիրական այլ ճանապարհներ։

Վահրամ Բալայանին չի զարմացանում ռազմավարական դաշնակցի այս հայտարարություն այն դեպքում, երբ այդ պետության ղեկավարը ստորագրել է հայտարարություն, որտեղ «այլ ճանապարհների» մասին խոսք չկա, փոխարենը Լաչինի միջանցքով անվտանգ տեղաշարժի երաշխիքներ են տվել։

Արտաքին հարաբերությունների մշտական հանձնաժողովի նախագահը նշեց, որ տարածաշրջանում յուրաքանչյուրն ունի իր խնդիրները և դրանք է լուծում։

«Եթե Հայաստանն Արցախը ճանաչել է Ադրբեջանի մաս, դուք այլ պետություններից ի՞նչ եք սպասում։ Խնդիրն այն է, որ Ռուսաստանը գնահատական է տվել, որ խնդիրը կա, ամենայն հավանականությամբ, բալանսը պահելու նկատառումով է ՌԴ-ի ներկայացուցիչը նման բան ասում։ Պետք է նշեմ, որ միևնույն ժամանակ նշում են՝ մի ճանապարհը չպետք է փոխարինվի մյուսով»,- հավելեց Բալայանը։

Հիշեցնենք, որ օգոստոսի 16-ին Հայաստանի դիմումի հիման վրա տեղի ունեցել ՄԱԿ ԱԽ հրատապ նիստը, որտեղ քննարկվել է Արցախում ստեղծված հումանիտար ճգնաժամի և Լաչինի ճանապարհի ապաշրջափակման հարցը։