Ընդդիմության դեմքերի փոփոխության հարց չէ․ ժողովուրդը պետք է համախմբվի. Հակոբ Տեր-Խաչատուրյան

«Պրեսսինգ» հաղորդաշարում Սաթիկ Սեյրանյանի հյուրը Հայ հեղափոխական դաշնակցության (ՀՅԴ) Բյուրոյի ներկայացուցիչ, Հայ դատի Կենտրոնական խորհրդի նախագահ Հակոբ Տեր-Խաչատուրյանն է։

Հարցազրույցի հիմնական թեզերը՝ ստորև.

• «Ցեղասպանություն» բառը հստակորեն ցույց է տալիս, որ ոճիրը կանխամտածված է։ Ցեղասպանության հանցանքն ունի իրավական հետևանք։ Անընդունելի է ՀՀ իշխանությունների կողմից «Մեծ եղեռն» եզրույթը կիրառելը։
   
• Հայաստանի իշխանությունները փորձում են ձեռքերը լվանալ թե՛ Արցախից, թե՛ Ցեղասպանությունից, թե՛ ազգային նպատակներից։
   
• Սփյուռքի մեջ կա շատ մեծ հիասթափություն ու հուսալքություն։ Այս իշխանություններն իրենց պառակտման քաղաքականությամբ հաջողել են մասնատել ժողովրդին, պառակտել նաև Սփյուռքը։
   
• ՀՀ վերջին երկու իշխանություններն ունեցել են ազգային նկարագիր։
   
• Այս իշխանությունների կողմից հարձակում կա մեր բոլոր արժեքների նկատմամբ։
   
• Սփյուռքում կա լուրջ հատված, որը պահանջատեր է։ Հիասթափությունն ու նահանջն ամենուրեք չեն։
   
• Ամեն կերպ պետք է վերականգնել հայրենիք-Արցախ-Սփյուռք եռամիասնության կոնցեպտը։
   
• Հրեաների ամբողջ էությունը սահմանված է Հոլոքոստով․աներևակայելի է, որ հրեաների մեջ կարող է լինել իշխանություն, որը հրաժարվի այն հիշելուց ու դատապարտելուց:
   
• Այս իշխանությունները Սփյուռք երրորդական-չորրորդական անձինք են ուղարկում, որ քանդեն, մասնատեն Սփյուռքը։
   
• Յուրաքանչյուր հայի պարտականությունն է Հայաստան պետությանն օգնելը, և դրա համար ոչ ոք գնահատանքի չպետք է սպասի։
   
• Պետությունը՝ որպես բացարձակ արժեք, մեր կենտրոնական գուրգուրանքի առարկան է։
   
• Այս իշխանությունները միայն Կենտրոնական Ամերիկայում չէ, որ փորձում են Սփյուռքի մեջ պառակտում մտցնել․ նույնը հիմա փորձում են անել Ֆրանսիայում։
   
• Թող շատ չուրախանան թուրքերն ու ազերները․Սփյուռքի ջախջախիչ մեծամասնությունը պատնեշի վրա է ու աշխատում է Հայ դատի համար։
   
• Ադրբեջանը միլիոններ է ծախսում իրենց համայնքը կազմակերպելու համար․ դրա համար նույնիսկ վարձկաններ է ներգրավում։
   
• Ես լուրջ կասկածներ ունեմ՝ արդյոք Սամսոն Օզարարատը թրքական ծագում ունեցող հա՞յ է, թե՞ հայկական որոշ ծագում ունեցող թուրք։
   
• Բանականությունը չի ընդունում, թե այս ժողովուրդը, որի հիմնական զենքը միասնականությունն է ազգային հարցերի շուրջ, ինչպե՞ս է դա հիմա կորցնում։
   
• Արևմուտքի համար կարևորը տարածաշրջանում ռուսական ազդեցության փոխարինումն է արևմտյան ազդեցությամբ։
   
• Ադրբեջանցիների «խավիարային դիվանագիտությունը» միշտ կա, և հիմա դա սաստկացած է։
   
• Արևմուտքում մեզ համոզում են, թե՝ ձեր ինչի՞ն են պետք Հայաստանում ռուսական ռազմաբազաները, եթե Արցախը մտնի Ադրբեջանի կազմի մեջ՝ ի՞նչ պետք է անեն ռուս խաղաղապահները, Ռուսաստանն ի վիճակի չէ ձեզ պաշտպանել…

• Հայաստանն Արևմուտքում ընդունում են՝ որպես անլուրջ իշխանություն ունեցող պետություն:
   
• Ադրբեջանը, գիտենալով իր արժեքն այս խաղի մեջ, փորձում է խաղալ երկու ուժերի հետ։
   
• Պետք է փորձել վերականգնել Մինսկի խմբի համանախագահների ֆորմատը։ Դրա ջատագովն ավելի շատ Ֆրանսիան է։ Ռուսաստանը գոհ է ներկա իրավիճակից, որովհետև հիմա Արցախն իր ազդեցության գոտում է։
   
• Մի բան հստակ է․Արևմուտքի համար հարմարագույն առիթ է, որ տարածաշրջանը վերջնականապես իր ազդեցության տակ դնելու հարցը լուծեն։
   
• Մենք լավ գիտենք մեր ամբողջ պատմության ընթացքում, որ երբ մեր թշնամիները՝ Թուրքիան և Ադրբեջանը, տեսել են պարտված հայկական իշխանություն, ավելին են պահանջել։
   
• Ռուսաստան-Ուկրաինա պատերազմն ուղղակիորեն անդրադառնում է տարածաշրջանի վրա։
   
• Մենք ակնկալում ենք, որ նվազագույնը Ռուսաստանը պետք է կարողանա պարտադրել կատարել Նոյեմբերի 9-ի եռակողմ հայտարարության պահանջները, որի կողմ է նաև ինքը։
   
• Մեր իշխանություններն ազգային շահի կոնցեպտ չունեն, և դա շատ վտանգավոր է:
   
• Իշխանությունները գնայուն են, իսկ մենք ունենք համահայկական ազգային շահի պահանջատիրություն։
   
• Մենք պետք է մերժենք ներկա իրողությունը ու մտքի և խոսքի հեղափոխություն պետք է ունենանք։
   
• 2020թ.-ից սկսված դիմադրության շարժումը դանդաղեցրեց զիջումների ընթացքը։
   
• Ընդդիմության դեմքերի փոփոխության հարց չէ․ ժողովուրդը պետք է համախմբվի։
   
• Միկրոֆոնը, այո՛, պետք է փոխվի, բայց շատ մարդիկ չեն ուզում միկրոֆոնը վերցնել։
   
• Քաղաքական կյանքում ճիշտ պահը բռնելը չափազանց կարևոր է։ Եթե չկարողանանք համախմբվել, այս իշխանության հիմքերը խարխլելը շատ դժվար է լինելու։
   
• Վստահ եմ դաշնակցական պատգամավորների վրա․ ԱԺ հարթակի օգտագործման ձևի հարցով կարող են լինել տարաձայնություններ։

Մանրամասները՝ տեսանյութում: