Ալիևը հայտարարել է, թե իբր ԼՂ-ում ՀՀ զորքեր կան, ու խոսել է «Զանգեզուրի միջանցքի» մասին

Ադրբեջանի նախագահ Իլհամ Ալիևն Անկարայում ընթացող «Թյուրքական երկրների միության» համաժողովի ժամանակ հայտարարել է, թե իբր Հայաստանն Արցախում պահպանում է «անօրինական զինված խմբավորումներ ու քրեածին տարրեր»։

Ադրբեջանի նախագահի հերթական մտացածին հայտարարությունը տարածում են տեղական լրատվամիջոցները։ 

«Չնայած Հայաստանը Պրահայում ու Սոչիում  2022 թ․-ին ճանաչել է Ադրբեջանի տարածքային ամբողջականությունն ու ինքնիշխանությունը, սակայն ամբողջությամբ դուրս չի բերել իր զորքերն Ադրբեջանի տարածքից։ Ղարաբաղում մնում են անօրինական հայկական խմբավորումներ ու քրեածին տարրեր», - հայտարարել է նա։ 

Հարևան երկրի նախագահը, ում հետ մեր իշխանությունները «խաղաղության օրակարգ» են մշակում, նաև ասել է, թե իբր Հայաստանը խուսափում է բացել այսպես կոչված «Զանգեզուրի միջանցքը», ու հոխորտացել, թե Երևանը պետք է դրա համար պատասխանատվություն կրի։