կարևոր
2899 դիտում, 1 տարի առաջ - 2022-11-14 16:19
Հասարակություն

ՀՅԴ «Թեհլիրեան» Ակումբի Վերանորոգուած Սրահի Բացում

ՀՅԴ «Թեհլիրեան» Ակումբի Վերանորոգուած Սրահի Բացում

ՀՅԴ «Թեհլիրեան» ակումբի վերանորոգ սրահի բացումը տեղի ունեցաւ շաբաթ, 12 նոյեմբերին, կէսօրէ ետք ժամը 4:00-ին` ներկայութեամբ ՀՅԴ Բիւրոյի, ՀՅԴ Լիբանանի Կեդրոնական կոմիտէի ընկերներուն, Պուրճ Համուտի, Ժտէյտէի եւ Հատասի քաղաքապետներուն, նախկին եւ ներկայ երեսփոխաններու եւ նախարարներու, ՀՅԴ Լիբանանի կոմիտէներու ներկայացուցիչներու եւ ուղեկից միութիւններու եւ շրջանի ժողովուրդին:

«Թեհլիրեան» կոմիտէին անունով խօսք առաւ Քրիսթին Սրապոնեան, որ յայտնեց, թէ հաւաքուած ենք «Սողոմոն Թեհլիրեան»-ի վերանորոգուած սրահի բացման արարողութեան մասնակցելու, բարերարութեամբ` նախկին երեսփոխան Ալեքսան Մաթոսեանի: Սրապոնեան հաստատեց, որ այս սրահը պիտի յատկացուի ժողովուրդին հետ առնչուած տարբեր ծրագիրներու գործադրութեան:

Ապա խօսք առաւ «Թեհլիրեան» կոմիտէի ներկայացուցիչ Ռոպեր Էշքիեան, որ նշեց, թէ այս օրերը կը զուգադիպին ՀՅԴ 132-ամեակի տօնակատարութիւններուն եւ առիթ կը հանդիսանան, որ Դաշնակցութիւնը ներկայանայ ժողովուրդին իր կատարած եւ կատարելիք ծառայութիւններուն մասին խօսելու համար:

Այս առաջադրանքներու պարունակին մէջ է, որ ՀՅԴ «Թեհլիրեան» կոմիտէն ձեռնարկած է իր սրահի վերանորոգման աշխատանքներուն: Այս աշխատանքները բնականաբար ինքնանպատակ չեն եւ կը միտին աւելի սերտացնել ժողովուրդ- կուսակցութիւն կապը:

Այս աշխատանքի իրականացման համար, նշեց Էշքիեան, կոմիտէն վայելեց նիւթաբարոյական օժանդակութիւնը ՀՅԴ Լիբանանի Կեդրոնական կոմիտէին, Պուրճ Համուտի քաղաքապետին, ինչպէս նաեւ կոմիտէի նուիրատուներուն: Ռոպեր Էշքիեան յատուկ կերպով նշեց բարերարութիւնը նախկին երեսփոխան Ալեքսան Մաթոսեանին, որ նաեւ մօտէն հետեւեցաւ սրահի վերանորոգման աշխատանքներուն:

ՀՅԴ Լիբանանի Կեդրոնական կոմիտէի խօսքը ուղղեց Կեդրոնական կոմիտէի ներկայացուցիչ, երեսփոխան Յակոբ Բագրատունի, որ հատատեց, որ շատ մը կազմակերպութիւններ, կուսակցութիւններ ընտրական շարժառիթներով նախընտրական-յետընտրական շրջաններուն կը բանան եւ ապա կը փակեն կեդրոններ: Մեր կեդրոնները մնայուն են եւ կը նպատակադրեն ժողովրդային տունի հանգամանքով մնայուն ծառայել ժողովուրդին: Մեր ակումբները ժողովրդային տուներ են եւ միայն ընտրական նպատակ չեն հետապնդեր: Մեր ժողովրդային տուները բաց են բոլորին առջեւ, բոլոր անոնք, որոնք մուտք կը գործեն այս տուներէն ներս, կ՛արժանանան գուրգուրանքի եւ ընկերական վերաբերումի:

Այս վերանորոգ սրահը պիտի ըլլայ նաեւ երիտասարդական կեդրոն, հաճելին եւ օգտակարն ու դաստիարակչականը իրար միաձուլելով միջավայր պիտի դառնայ` երիտասարդական առողջ միջավայր ձեւաւորելով: Բագրատունի գնահատեց բարերար Ալեքսան Մաթոսեանին այս նախաձեռնութիւնը` շեշտելով, որ նման աջակցութիւններով է, որ կարելի կ՛ըլլայ իրականութիւն դարձնել մեր առաջադրանքներուն համապատասխան ծրագիրներ եւ շարունակել միշտ ծառայել մեր ժողովուրդին:

«Այս կեդրոնը մեր ժողովուրդին է, ապրեցուցէ՛ք զայն, ու միասնաբար կը պահենք մեր ազգային ու հայեցի դիմադրականութիւնը», եզրակացուց Յակոբ Բագրատունի: