Վրաստանի նախագահը Երեւանի եւ Բաքվի միջեւ բանակցությունների հաջողության հույս ունի

Վրաստանի նախագահ Սալոմե Զուրաբիշվիլին Երեւանի և Բաքվի միջև խաղաղ բանակցությունների հաջող շարունակման հույս ունի։ Այդ մասին նա ասել է ՀՀ նախագահի հետ համատեղ ճեպազրույցում։

Վահագն Խաչատրյանը երկօրյա պաշտոնական այցով գտնվում է Թբիլիսիում։ Սա Խաչատրյանի առաջին պաշտոնական արտասահմանյան այցն է պետության ղեկավարի պաշտոնում ընտրվելուց հետո։

«Մեր տարածաշրջանի ապագան սերտորեն կապված է խաղաղ միջավայրի հետ: Հուսով ենք, որ Հայաստանի և Ադրբեջանի միջև բանակցությունները հաջողությամբ կշարունակվեն։ Մենք ողջունում ենք Եվրամիության ներգրավվածությունն այս գործընթացում։ Մենք գիտենք, որ այս տարածաշրջանում մշտական խաղաղության հաստատումը կախված է այս բանակցությունների արդյունքից, իսկ տնտեսական զարգացումը կախված է խաղաղության հաստատումից»,- ասել է Վրաստանի ղեկավարը։

Զուրաբիշվիլին նաև կարծում է, որ Վրաստանում հայերի և ադրբեջանցիների խաղաղ գոյակցությունը դրական օրինակ է ողջ Կովկասի համար։