Սիրիան չի կարող որևէ շփում ունենալ ահաբեկչության հովանավոր Թուրքիայի հետ. Սիրիայի ԱԳՆ

Սիրիան հաստատել է, որ թուրքական ռեժիմի հետ շփումներ չկան, ինչպես պնդում են թուրք որոշ պաշտոնյաներ։ Ավելին` ահաբեկչության դեմ պայքարի ոլորտում երկիրը չի կարող որևէ փոխգործակցություն ունենալ տարածաշրջանում և աշխարհում ահաբեկչությանն աջակցող, մարզող և տարածող այս ռեժիմի հետ. հայտնում է սիրիական SANA գործակալությունը։

Արտաքին գործերի և արտագաղթի նախարարության պաշտոնական աղբյուրը գործակալությանը բացատրել է, որ Էրդողանի վարչակարգի կողմից Սիրիայի քաղաքացիների դաժան գնդակոծությունների հետ մեկտեղ, այս ռեժիմը իրեն հավատարիմ ահաբեկչական խմբավորումների հետ փորձում է հրապարակել կամ կեղծ լուրերի արտահոսք կազմակերպել անվտանգության կամ քաղաքական մակարդակով սիրիական կառավարության և թուրքական ղեկավարության ներկայացուցիչների միջև ենթադրյալ շփումների մասին:

Ինչպես հավելել է աղբյուրը, կեղծ հայտարարություններից վերջինը Թուրքիայի արտգործնախարարի հայտարարությունն էր ահաբեկչության դեմ պայքարում Սիրիայի հետ համագործակցության հնարավորության մասին։ Սա վկայում է «Մուսուլման եղբայրներին» հավատարիմ ռեժիմի` իրականությունից լիակատար հեռացման մասին: Սուտն ու հորինվածքն արդեն գալիս են ոչ միայն Էրդողանից, այլեւ այլ պաշտոնյաներից։

Աղբյուրն ընդգծել է, որ Սիրիայի Արաբական Հանրապետությունը հերքում է այս բոլոր հայտարարությունները, լուրերն ու արտահոսքերը և դրանք համարում քաղաքական անհեթեթություն։ Սիրիան թափանցիկ կհայտարարի ցանկացած համագործակցության մասին, եթե դա տեղի ունենա կողմերից որևէ մեկի հետ՝ ընդգծելով, որ Դամասկոսը չի կարող համագործակցել ահաբեկչական ռեժիմի հետ, որն աջակցում, մարզում և տարածում է ահաբեկչությունը տարածաշրջանում և աշխարհում։