Զինակոչի տարիքում գտնվող արական սեռի բոլոր ներկայացուցիչներին, այդ թվում՝ ազգությամբ հայերին արգելվում է լքել Ուկրաինան․ Խարկովում ՀՀ պատվավոր հյուպատոսի օգնական

«Ուկրաինայից այս պահին մարդկանց, այդ թվում՝ հայերի տարհանման համար տարբեր ճանապարհներ կան, որից մեկը գնացքն է, որն աշխատում է ամեն օր՝ սպասարկելով օրական մի քանի ուղղություն։ Ճիշտ է՝ ճանապարհը շատ դժվար է, երկար և ոչ հարմարավետ, բայց, ամեն դեպքում, շատ հայ ընտանիքներ արդեն իսկ գնացքով մեկնել են Լվով, շատերը մնացել են երկրի արևմտյան շրջաններում, ոմանք էլ այնտեղից մեկնել են եվրոպական երկրներ կամ պատրաստվում են վերադառնալ հայրենիք»,- «Փաստինֆո»-ի հետ զրույցում ասել է Խարկովում ՀՀ պատվավոր հյուպատոսի օգնական Համլետ Հովհաննիսյանը՝ խոսելով Ուկրաինայում գտնվող հայազգի բնակիչների տարհանման խնդիրների մասին։

«Փաստինֆո»-ն ահազանգեր է ստացել Ուկրաինայում ապրող հայերից, որ զինակոչի տարիքում գտնվող երիտասարդներին թուլ չեն տալիս հեռանալ երկրից, նրանց հետ միասին մնում են նաև ընտանիքների անդամները, հարազատները։ Արձագանքելով՝ Համլետ Հովհաննիսյանը փաստել է, որ զինակոչման տարիքում գտնվող այդ թվում ազգությամբ հայ տղաներին արգելվել է լքել երկիրը։

«Խարկովում ռազմական գործողությունների արդյունքում, մարտի 1-ի դրությամբ, հայ ընտանիքի անդամներ են վիրավորվել։ Նրանք վիրահատության են ենթարկվել, վիրահատությունը բարեհաջող է անցել և հիմա արդեն ապաքինման փուլում են։ Թե որքա՞ն վիրավոր կամ զոհված հայ կա Ուկրաինայում վերջին ռազմական գործողությունների հետևանքով, այս պահին դեռևս պաշտոնական որևէ տվյալ չկա։ Մեր ունեցած տեղեկություններով՝ Խարկովում հայազգի զոհեր չկան»,- ասել է Խարկովում հյուպատոսի օգնականը։