Ի՞նչ է պետք «ավանգարդ» դիրքերում լինելու համար. «Փաստ»

«Փաստ» օրաթերթը գրում է. «Ժամանակին, երբ Նիկոլ Փաշինյանը ընդդիմադիր պատգամավոր էր, միշտ էլ ամեն ինչ արել է անլրջացնելու խորհրդարանական գործունեությունը, քաղաքական դիսկուրսը վերածելու բամբասանքի ու դատարկ աղմուկի մակարդակի, փողոցի մակարդակի: Բարեբախտաբար, նախորդ գումարումների խորհրդարանի մեծամասնությունը, ինչպես նաև այլ ընդդիմադիրները տուրք չեն տվել այդ ամենին, և նա, որպես այդպիսին, գրեթե միայնակ էր: Լավ, գուցե հնարավոր է՝ 1-2 այլ բացառություններով:

Հիմա Նիկոլ Փաշինյանի թիմը խորհրդարանում մեծամասնություն է և անում է այն ամենը, ինչ չի հաջողվել «շեֆին» ընդդիմադիր եղած ժամանակ: Արդյունքում խորհրդարանը վերածել են «մսուր-մանկապարտեզի»: Թվում էր՝ պատերազմում պարտված, հսկայական տարածքներ հանձնած, հազարավոր զոհերի պատճառ դարձած, բոլոր ոլորտներում ձախողված, երկրի ինքնիշխանությունը վտանգի տակ դրած իշխանության ներկայացուցիչները գոնե մի փոքր ամոթի զգացում պիտի ունենային ու համեստություն դրսևորեին:

Սակայն այդպես չէ, ու երբեմն տպավորություն է, թե քպ-ականների մեջ «ավանգարդ» դիրքերում լինելու համար պարտադիր է շրիշակից ցածր մակարդակն ու ամոթի իսպառ բացակայությունը: Խորհրդարանական վերջին օրերի քննարկումները (և ոչ միայն դրանք) նշվածի վառ վկայությունն են: Հասկանալի է, որ նույնիսկ ՔՊ-ում բոլորը չեն այդպիսին, սակայն փորձը ցույց է տալիս, որ նշվածի դասին չպատկանողները, կարծես, փոքրամասնություն են ու առանձնապես իրենց ի ցույց չեն դնում»:

Առավել մանրամասն՝ թերթի այսօրվա համարում