Երբ ռուսները գալիս են, դժվարությամբ են հեռանում. Ժոզեպ Բորել

ԵՄ դիվանագիտության ղեկավար Ժոզեպ Բորելը մտավախություն է հայտնել, որ Ղազախստան ուղարկված ռուս զինվորականները կարող են մնալ այս երկրում։

«Փորձը ցույց է տվել, որ երբ ռուսները գալիս են, նրանք դժվարությամբ են հեռանում», - ասել է նա BBC Radio 4-ին:

Ավելի վաղ նման տեսակետ էր հայտնել ԱՄՆ պետքարտուղար Էնթոնի Բլինքենը։ Նա ասել էր, որ չի հասկանում, թե ինչու է Ղազախստանին անհրաժեշտ դրսի օգնություն՝ բողոքները ճնշելու համար։

«Երբ Ռուսաստանը գալիս է քո տուն, երբեմն դժվար է նրան ստիպել հեռանալ»,- հավելել էր նա։

Հունվարի 5-ին Ղազախստանի նախագահը դիմել է ՀԱՊԿ երկրների ղեկավարներին՝ խնդրելով օգնել հաղթահարել ահաբեկչական սպառնալիքը։ Հունվարի 6-ին հայտնի դարձավ ՀԱՊԿ խորհրդի՝ Ղազախստան խաղաղապահ ուժեր ուղարկելու որոշման մասին։ Զորակազմը գլխավորում է ՌԴ օդադեսանտային ուժերի հրամանատար, գեներալ-գնդապետ Անդրեյ Սերդյուկովը։ Մոսկվան և Նուր Սուլթանը վստահեցրել են, որ խաղաղապահները կմնան Ղազախստանում մինչև իրավիճակի ամբողջական կայունացումը, սակայն նրանց մնալը կլինի ժամանակավոր։