Նոյեմբերի 8-ի հանրահավաքին և՛ վարչախմբին, և՛ միջազգային հանրությանը փոխանցելու ենք 3 կարևոր ուղերձ․ Գեղամ Նազարյան

Նրանք, ովքեր սիրում են այս երկիրը, նրանք ովքեր ուզում են՝ պետության ողնաշարն ուղղվի, արժանապատվության փուլ մտնի, բոլորս հավաքվելու ենք և՛ վարչախմբին, և՛ միջազգային հանրությանը փոխանցենք երեք կարևոր ուղերձ, Yerevan.Today-ի հետ զրույցում ասաց «Հայաստան» խմբակցության պատգամավոր Գեղամ Նազարյանը։

Հիշեցնենք, որ «Հայաստան» դաշինքը նոյեմբերի 8–ին` ժամը 18։00-ին, հրավիրում է հանրահավաք Ազատության հրապարակում։

Պատգամավորը թվարկեց երեք ուղերձները․

• ՀՀ-ն չի կարող միջանցք տրամադրել որևէ պետության,
• Արցախը չի կարող լինել Ադրբեջանի կազմում,
• Հայաստանը այլևս տարածքներ չունի՝ Ադրբեջանին նվիրելու։

«Մենք որքան շատ լինենք հրապարակում, այնքան մեր ուղերձը ավելի հասանելի կլինի, ավելի հասկանալի  կլինի բոլորի համար։ Մեր հավաքով նաև վարչախմբին հասկացնում ենք, որ իրենք որքան շուտ հեռանան, այդքան լավ՝ բոլորի համար։ Պարտված դեմքով վարչախումբը չի կարող ղեկավարել Հայաստանը»,- ասաց Նազարյանը։

Նա նաև հայտնեց, որ այդ հավաքով նաև հարգանք է մատուցվում բոլոր նրանց՝ մեր նահատակներին և հրաշքով փրկված՝ պատերազմի մասնակիցներին, որոնք կարողացան փրկել այն, ինչ մնաց ՀՀ վերահսկողության տակ։

«Ամեն օր մոտեցնելով վարչախմբի հրաժարականը՝ ամեն օր մոտեցնում ենք նոր Հայաստանի կերտման սկիզբը։ Մեր ամենօրյա աշխատանքը, մեր պայքարը պետք է դրան միտված լինի, մենք ուրիշ անելիք չունենք։ Բոլոր նրանք, ովքեր այս կամ այն պատճառով ասում են, թե՝ եթե նոյեմբերի 8-ին իշխանություն չեք վերցնելու, մենք չենք գալու հրապարակ, դա պատրվակ է միայն՝ արդարացնելու իրենց չգալը»,- ասաց պատգամավորը: