Խաչատուր Սուքիասյանի եղբայրն ազատ է արձակվել

Aysor.am-ը գրում է.

«ԱԺ «Քաղաքացիական պայմանագիր» խմբակցության պատգամավոր Խաչատուր Սուքիասյանի եղբայրը՝ Ռոբերտ Սուքիասյանն, ազատ է արձակվել, տեղեկությունն Aysor.am-ին հայտնեց փաստաբան Գոռ Միքայելյանը։

 Նա նշեց, որ Երևանի ընդհանուր իրավասության դատարանը՝ դատավոր Վաչե Մարգարյանի նախագահությամբ, բավարարել է Սուքիասյանին գրավի դիմաց ազատ արձակելու մասին միջնորդությունը՝ գրավի չափ սահմանելով 50 մլն դրամը։

 «Գրավի գումարն արդեն փոխանցվել է դատարանի դեպոզիտ հաշվին. պարոն Սուքիասյանն ազատ է արձակվել», - նշեց Միքայելյանը։

 Հիշեցնենք՝ հուլիսի 18-ին Ամիրյան փողոցում կրակոցներ էին հնչել, ինչից հետո «Արմենիա» բժշկական կենտրոն բուժօգնության էր դիմել 1979թ. ծնված ԱՄՆ մի քաղաքացի՝ ոտքի շրջանի հրազենային վնասվածքով։

 Ըստ քննչական կոմիտեի՝ պարզվել են տեղի ունեցած խուլիգանության դեպքի մի շարք հանգամանքներ, ենթադրյալ հանցագործություն կատարած անձի ինքնությունը, որը Երևանի բնակիչ Ռոբերտ Սուքիասյանն է։