Թեհրանը պատրաստ է բանակցությունների՝ ԱՄՆ պատժամիջոցներն ամբողջությամբ չեղարկելու համար. Իրանի փոխարտգործնախարար

Թեհրանը պատրաստ է շարունակել բանակցությունները միջուկային գործարքի վերականգնման և ԱՄՆ պատժամիջոցների ամբողջական վերացման շուրջ։ Այս մասին Բրյուսելում ԵՄ արտաքին գործերի գլխավոր քարտուղարի տեղակալ Էնրիկե Մորայի հետ հանդիպման ժամանակ հայտարարել է Իրանի փոխարտգործնախարար Ալի Բաղերին, որի խոսքերը մեջբերում է IRIB պետական հեռուստաալիքը։

«Թեհրանը վճռական է բանակցություններ վարել ճնշող և անօրինական պատժամիջոցների ամբողջական և արդյունավետ վերացման շուրջ, որպեսզի երաշխավորի Իրանի հետ առևտրատնտեսական հարաբերությունների կարգավորումը»,- ասել է նա։

2015 թվականին Մեծ Բրիտանիան, Գերմանիան, Չինաստանը, Ռուսաստանը, ԱՄՆ-ը, Ֆրանսիան և Իրանը ստորագրեցին JCPOA-ն: Գործարքը ներառում էր պատժամիջոցների վերացում Իրանի միջուկային ծրագրի սահմանափակման դիմաց՝ որպես Թեհրանի կողմից միջուկային զենք չստանալու երաշխիք: 2018 թվականի մայիսին ԱՄՆ այն ժամանակվա նախագահ Դոնալդ Թրամփը որոշեց միակողմանիորեն դուրս գալ գործարքից և վերականգնել Թեհրանի դեմ կոշտ պատժամիջոցները։ Ի պատասխան՝ Իրանը հայտարարեց համաձայնագրով ստանձնած իր պարտավորությունների փուլային կրճատման մասին՝ հրաժարվելով միջուկային հետազոտությունների, ցենտրիֆուգների և ուրանի հարստացման մակարդակի սահմանափակումներից։

Վիեննայում բանակցություններ են ընթանում JCPOA-ի վերականգնման և Իրանի նկատմամբ ԱՄՆ պատժամիջոցների չեղարկման շուրջ։ Վեցերորդ փուլն ավարտվել է հունիսի 20-ին։