Սիրիացի մեկ զինվոր է զոհվել, երեքը՝ վիրավորվել Իսրայելի օդուժի հարվածի հետևանքով. ՌԴ ՊՆ

Սիրիացի մեկ զինվոր է զոհվել, ևս երեքը վիրավորվել են Պալմիրայի շրջանում ֆոսֆատային գործարանի վրա իսրայելական օդուժի հարվածի հետևանքով. հոկտեմբերի 14-ին հայտնել է Սիրիայում հակամարտող կողմերի հաշտեցման կենտրոնի ղեկավարի տեղակալ Վադիմ Կուլիտը։

Հիշեցնենք, որ հոկտեմբերի 13-ի լույս 14-ի գիշերը Իսրայելի ռազմաօդային ուժերի չորս F-16 կործանիչներ մուտք են գործել Սիրիայի օդային տարածք ԱՄՆ-ի կողմից օկուպացված Ալ Թանֆ գոտում՝ Սիրիայի Հոմս նահանգում, հարվածել Պալմիրայի մոտ գտնվող ֆոսֆատային հանքաքարի գործարանին, ինչպես նաև քանդել կապի աշտարակը։

«Սիրիայի ռազմական ղեկավարությունը որոշել է չկիրառել ՀՕՊ համակարգեր, քանի որ Իսրայելի ավիացիոն հարձակման պահին երկու քաղաքացիական ուղևորատար ինքնաթիռ է եղել ՀՕՊ համակարգերի ոչնչացման գոտում՝ Դուբայ-Բեյրութ և Բաղդադ-Դամասկոս երթուղիներով»,- ասել է Վադիմ Կուլիտը:

«Իսրայելի ավիացիոն հարվածի արդյունքում մեկ սիրիացի զինվոր է զոհվել, ևս երեքը՝ վիրավորվել: Գործարանը կրել է նյութական վնաս»,- հայտնել է ռուսական կենտրոնի ղեկավարի տեղակալը:

Հարկ է նշել, որ Իսրայելի ղեկավարությունը Սիրիայի տարածքում օդային հարվածներն արդարացնում է իրանամետ «Հըզբոլլահ» շարժման դեմ պայքարելու անհրաժեշտությամբ: