Հունգարիայի և Ուկրաինայի միջև սկանդալ է հասունանում

Հունգարիայիում Ուկրաինայի դեսպանը կանչվել է ԱԳՆ: Պատճառը Կիևի արձագանքն է ռուսական գազի մատակարարման պայմանագրին, որը երկուշաբթի ստորագրել էին «Գազպրոմի» և հունգարական MVM էներգետիկ ընկերության ներկայացուցիչները:

Կիևում համաձայնագրի կնքումը համարել են «բացառապես քաղաքական», «տնտեսապես չարդարացված» և «Կրեմլին հաճոյանալու համար և ի վնաս Ուկրաինայի ազգային շահերի ու ուկրաինա-հունգարական հարաբերությունների»: Իսկ «Ուկրաինայի գազատրանսպորտային համակարգի օպերատորի» գլխավոր տնօրեն Սերխիյ Մակոգոնը չի բացառել, որ Ուկրաինայի տարածքով դեպի Հունգարիա գազի տարանցումը կարգելափակվի:

«Եվրահանձնաժողովի միջոցով այս համաձայնագրի դեմ Ուկրաինայի կառավարության գործողությունները չափազանց վրդովեցուցիչ են»,- ասել է Հունգարիայի արտգործնախարար Պետեր Սիյարտոն իր ֆեյսբուքյան էջում տեղադրված հայտարարության մեջ:

«Ուկրաինան ոչ մի կապ չունի այն բանի հետ, թե ում հետ ենք մենք բանակցում»,- ասվում է փաստաթղթում:

Սիյարտոն ընդգծել է, որ Բուդապեշտը Կիևի այդպիսի քայլերն ընկալում է որպես «Հունգարիայի ինքնիշխանության և ազգային անվտանգության շահերի խախտում»: «Հունգարիայի համար ամենից կարևորն այն է, որ հունգարացին ձմեռները չմրսի»,- եզրափակել է նա: